Օվերչուկը բացում է փակագծերը. Ի՞նչ է սպասվում «միջանցքին»

Մոսկվայում առաջիկայում կայանալու է Ռուսաստանի, Հայաստանի և Ադրբեջանի փոխվարչապետների հանդիպումը Հարավային Կովկասում տրանսպորտային հաղորդակցությունների ապաշրջափակման հարցերի շուրջ։ Ինչպես ավելի վաղ գրել էինք Փաշինյանն ինքը համաձայնվել է միջանցքային տրամաբանությանը և միջանցք տրամադրելուն՝ պայմանով, որ այն միջանցք չի կոչվելու և նաև փաստաթղթում նշվելու է դրա ժամանակավոր հինգ կամ տասը տարի ժամկետը, իսկ վերահսկողությունն իրականացվելու է ռուսական կողմից։

Մինչ Փաշինյանն ու նրա իշխանության տարբեր ներկայացուցիչներ փորձում են խուսանավել այդ կարևորագույն հարցերից, Ռուսաստանի փոխվարչապետ Ալեքսեյ Օվերչուկը «Ինտերֆաքս»-ի հետ զրույցում նշել է, թե պայմանավորվածություն է ձեռք բերվել աշխատանքային խմբի հանդիպումը տեղի կունենա առջիկայում։ Հարցերը, որոնք կքննարկվեն Ադրբեջանի և Հայաստանի միջև սահմանի հատման եղանակին վերաբերող տեխնիկական մանրամասներին։ Բանն այն է, որ այդ սահմանին լինելու է անձնագրային, մաքսային և բոլոր այլ տեսակի հսկողություն, որոնք գոյություն ունեն միջազգային սահմաններին։

Նա նշել է, որ «Կողմերն այսօր շատ մոտ են նրան, որ խոսել են այն մասին, որ մենք կարող ենք վերկանգնել երկաթուղային հաղորդակցությունը Ադրբեջանի և Նախիջևանի միջև։ Նաև Հայաստանը հնարավորություն է ստանում ապաշրջափակել ու շարժվել Նախիջևանով Սյունիքով և Ադրբեջանում դեպի Ռուսաստան, ԵՄ երկրներ, ինչպես նաև դուրս գալ Իրան»,- ասել է Ռուսաստանի փոխվարչապետը։

Տարօրինակն այս ամենում Իրանի անունը տալն է, առանց այն էլ Հայաստանը բնական ելք ունի դեպի Իրան, իսկ Եվրամիություն կամ Ռուսաստան մեկնելու համար բնականաբար մեր երկիրը ադրբեջանի տարածքը օգտագործելու որևէ կարիք չունի, անգամ որևէ կերպ հարաբերությունները կարգավորելուց հետո։

Օվերչուկն իհարկե դիվանագիտորեն շրջանցում է հարցը թե ով է վերահսկելու այդ միջանցքը, սակայն գրեթե կասկած չկա, որ նրա կողմից այսպիսի նախաձեռնողականությունը, ինչպես նաև նախապես խնդրին անդրադառնալը փաստում է, որ Ռուսաստանը վերցրել է իր ձեռքը խնդրի լուծման ուղիները և ամեն ինչ անելու է, որպեսզի միջանցքը լինի հենց ռուսների վերահսկողության տակ։ Փաշինյանը, բազմիցս, վերջին տարիներին պնդել է, թե որևէ միջազգային տրամաբանութամբ չեն գործելու, սակայն ինչպես տասնյակ դեպքեր կարելի է մատնանշել գործող իշխանությունների պարագայում, երբ նրանց խոսքն ու գործը հակասել են իրար, այս անգամ ևս մենք դրա ականատեսն ենք լինելու։

Գարիկ Բեգլարյան