Վերին Խոտանան-Տանձավեր ճանապարհին մեքենան գլորվել է ձորակը. կա վիրավոր

Մայիսի 31-ին, ժամը 22։52-ին Սյունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Վերին Խոտանան-Տանձավեր ավտոճանապարհին տեղի է ունեցել ավտովթար՝ ավտոմեքենան գլորվել է հարակից ձորակը. կա տուժած:

ՆԳՆ փրկարար ծառայությունից NEWS.am-ին հայտնում են, որ dեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի Աղվանիի հենակետից մեկ մարտական հաշվարկ:

Պարզվել է, որ Վերին Խոտանան-Տանձավեր ավտոճանապարհի առաջին կմ-ին «Gaz 3102» մակնիշի ավտոմեքենան (վարորդ՝ Ա. Բ., ծնված 1976 թ.) դուրս է եկել ճանապարհի երթևեկելի հատվածից, բախվել քարին և շրջվել ձորակը (մոտ 10 մ), ինչի հետևանքով քարը գլորվել և վնասել է գյուղի 3-րդ փողոցի տներից մեկի պատը (մոտ 1 քմ):

Մինչ փրկարարների կանչի վայր հասնելը` վարորդը հոսպիտալացվել է Կապան քաղաքի ԲԿ, որտեղ բժիշկները նրա առողջական վիճակը գնահատել են բավարար։

Փրկարարները հոսանքազրկել են ավտոմեքենան, փակել գազի բալոնի փականը և իրականացրել հերթապահություն՝ մինչ ոստիկանության աշխատակիցների ժամանումը։