Փաշինյանի խոստովանանքը. Մոսկվայի հանդիպման ձախողումը մտահոգիչ է

Մինչ Փաշինյանի սպասարկուների մի հատված ուրախության կռնչոցներ է արձակում Մոսկվայում եռակողմ հանդիպման ձախողման վերաբերյալ, նույնիսկ ինքը՝ վարչապետի պաշտոնը զբաղեցնող Նիկոլ Փաշինյանը ստիպված է եղել արձանագրել, որ շատ ցավալի և մտահոգիչ իրավիճակ է։

Նա նշել է, թե գոհ չի օրեր առաջ Մոսկվայում տեղի ունեցած բանակցությունների ժամանակ որոշ հարցերի քննարկումից, մանրամասնել է, որ խոսքը վերաբերում է Լեռնային Ղարաբաղում տիրող հումանիտար իրավիճակին և Լաչինի միջանցքի ապօրինի շրջափակմանը վերաբերող հարցերին։ «Պիտի արձանագրենք, որ շատ ցավալի իրավիճակ է ու մտահոգիչ է, որ Լաչինի միջանցքի փակումը տեղի է ունեցել ռուս խաղաղապահների աչքի առաջ»։ Փաշինյանը վստահեցրել է, որ իրադրության կարգավորման ուղղությամբ քննարկումները դեռ շարունակվելու են։ Ի դեպ նա հունիսի 7-8 մեկնելու է Սոչի, որտեղ նախատեսված է Եվրասիական միջկառավարական խորհրդի նիստը։ Նախատեսված է Հայաստանի և ռուսաստանի վարչապետների հանդիպումը։

Ըստ էության, Մոսկվայում Նիկոլ Փաշինյանի և նրան երկրորդող Իլհամ Ալիևի վարքի պատճառով Ռուսաստանի նախագահ Վլադիմիր Պուտինը հայտնվեց բավականին անհեթեթ իրավիճակում, թեև մինչ այդ ռուսական կողմը հայտնել էր, որ առնվազն երկու փաստաթուղթ է ստորագրվելու, իսկ ստեղծված իրավիճակում, երբ Ռուսաստանն առանձնակի մեծ լծակներ չունի Ադրբեջանի վրա ազդելու, ամբողջ կուժն ու կուլան կոտրվելու է հայկական կողմի գլխին։ Ըստ էության հենց դա նկատի ունի Փաշինյանը՝ նշելով, որ գոհ չէ բանակցությունների ընթացքից։ Այն, որ Ռուսաստանը չի ներելու Փաշինյանի և նրա կողմնակիցներին շարունակաբար պաշտոնական Մոսկվային նման փաստերի առջև կանգնեցնելու համար, թերևս որևէ մեկի մոտ կասկած չի հարուցում։

Խնդիրն այն է, թե որքան է Ուկրաինայում Ռուսաստանը խրված մնալու պատերազմական գործողությունների մեջ, ինչից հետո արդեն ձեռնամուխ կլինի նաև Հայաստանում իրավիճակի կարգավորմանը ըստ իր շահերի։ Թերևս Փաշինյանն ինքն էլ հասկանում է, թե ինչ խնդիրներ է բերել թե՛ իր գլխին և թե՛ Հայաստանի։

Արթուր Պապինյան