Քաղաքագետը գնահատել է ԼՂ-ն Ադրբեջանի կազմում ճանաչելու պայմանները
ՀԱՍԱՐԱԿՈՒԹՅՈՒՆ
Iz.ru–ն գրում է, որ հայ բնակչության անվտանգության ապահովման պարամետրերը կարող են շատ տարբեր լինել՝ Ադրբեջանի համար ընդունելիից մինչև կտրականապես անընդունելի լինելուց։ Այդ մասին «iz.ru»-ին հայտնել է ՌԴ կառավարությանն առընթեր ֆինանսական համալսարանի փորձագետ Դենիս Դենիսովը։
Նման կերպ է նա արձագանքել Հայաստանի վարչապետ Նիկոլ Փաշինյանի այն հայտարարությանը, թե Երևանը պատրաստ է ԼՂ-ն ճանաչել որպես Ադրբեջանի մաս հայ բնակչության անվտանգության ապահովման պայմանով։
«Սկզբունքորեն նմանատիպ հայտարարություններ, բայց ավելի քողարկված, մեկ անգամ չէ, որ հնչել են Հայաստանի վարչապետի կողմից։ Եվ այս ինտենսիվ բանակցությունները, որոնք ընթանում էին վերջին մի քանի ամիսների ընթացքում Մոսկվայում, Վաշինգտոնում և Բրյուսելում, ըստ երևույթին, որոշակի ճնշում են գործադրել հակամարտող կողմերի վրա փոխզիջումային որոշումներ կայացնելու համար»,- ասել է Դենիսովը։
Սակայն, ինչպես ընդգծել է քաղաքագետը, պետք է հասկանալ, թե ի՞նչ ի նկատի ունի Փաշինյանը խոսելով հայ բնակչության անվտանգության ապահովման պայմանների մասին։
«Առանց բուն բանաձևի ընդունման հետ կապված այն շատ հստակ բացատրությունների, թե ինչպես է Փաշինյանը տեսնում այդ անվտանգության ապահովումը և ընդհանուր առմամբ իրավիճակը տարածաշրջանում, դժվար թե հնարավոր լինի որևէ լուրջ հետևություն անել և իրավիճակի զարգացման հեռանկարներ կառուցել ելնելով դրանից: Փաստն այն է, որ անվտանգության ապահովման բուն պարամետրերը կարող են շատ տարբեր լինել՝ Ադրբեջանի համար ընդունելիից մինչև կտրականապես անընդունելի լինելը։ Այդ նրբերանգը մնում է չափազանց կարևոր»,- ասել է նա։
Ընդ որում, այստեղ առանցքային կետը մնում է կողմերի քաղաքական կամքը, հավելել է Դենիսովը։ Եթե նրանք իսկապես հաստատակամ են իրավիճակը կարգավորելու հարցում, ապա որոշ չափով փոխզիջումային տարբերակներ կարող են լինել, պարզաբանել է նա։ «Կարծում եմ, եթե դա սկզբունքային դիրքորոշում է, որն ուղղված է հակամարտության ամբողջական կարգավորմանը, ապա դա որոշակիորեն փոխզիջում է Հայաստանի տեսանկյունից։ Բայց այստեղ հիմա պետք է լսել հակառակ կողմին»,- եզրափակել է փորձագետը:
Նյութը հրապարակման պատրաստեց Կամո Խաչիկյանը
