Փորձագետ. Հայաստանի բնակիչներն ատամները կրճտացնելով կընդունեն Ղարաբաղի հարցում Փաշինյանի որոշումը
ՎԵՐԼՈՒԾՈՒԹՅՈՒՆՆԵՐ
Vz.ru–ն գրում է, որ հայ հասարակությունը, ամենայն հավանականությամբ, կընդունի Փաշինյանի Ղարաբաղը Ադրբեջանի կազմում ճանաչելու գաղափարը, սակայն Ստեփանակերտը դրան խիստ բացասաբար կարձագանքի։ Այս մասին vz.ru–ին ասել է Ռուսաստանի պետական համալսարանի արտաքին տարածաշրջանային հետազոտությունների և արտաքին քաղաքականության ամբիոնի դոցենտ, քաղաքագետ Վադիմ Տրուխաչովը։ Ավելի վաղ Հայաստանի վարչապետ Նիկոլ Փաշինյանը հայտարարել էր, որ երկիրը պատրաստ է ճանաչել Լեռնային Ղարաբաղը որպես Ադրբեջանի մաս։
«Նիկոլ Փաշինյանի քաղաքականությունն ամբողջությամբ թելադրված է արևմտյան երկրների Անդրկովկասը Ռուսաստանի ազդեցությունից հեռացնելու անհրաժեշտությամբ։ Ներկա պահին Վրաստանի հետ մեր հարաբերությունները որոշ չափով մեղմացել են, ուստի Վաշինգտոնի և Բրյուսելի համար հրատապ անհրաժեշտություն է դարձել ստեղծել նոր տարածաշրջանային խնդիր Մոսկվայի համար»,- ասել է նա։
«Ցավոք, արժե ընդունել, որ ՆԱՏՕ-ն և ԵՄ-ն ակտիվորեն նպաստում են Հայաստանին և Ադրբեջանին Ռուսաստանից հեռացնելու գործընթացին փորձելով Երևանը տեղափոխել Ֆրանսիայի պաշտպանության տակ, իսկ Բաքվին Թուրքիայի։ Նրանց գերխնդիրն է լուծել երկու երկրների առճակատումը, որպեսզի ոչինչ չխանգարի նրանց աստիճանական ինտեգրմանը արևմտյան ճամբարին»,- նշել է փորձագետը։
«Սրանով են բացատրվում Ղարաբաղի և ՀԱՊԿ-ի վերաբերյալ հնարավոր որոշումները։ Իհարկե, Ստեփանակերտում տեղի բնակչությունը չի ողջունում Երևանի նման առաջարկը։ Տեղի հայերը ծայրաստիճան ռուսամետ են, և նրանք հասկանում են, թե ինչի կհանգեցնեն հայտարարված փոփոխությունները,- ընդգծել է զրուցակիցը,– սակայն Հայաստանում, ամենայն հավանականությամբ, այդ որոշումը տեղի բնակիչները կընդունեն՝ ատամները կրճտացնելով։ Ի վերջո, Փաշինյանը վերընտրվել է վարչապետ, և բոլորը գիտեն նրա դիրքորոշումը Ղարաբաղի հարցում։ Բացի այդ, ազդում է Ադրբեջանի հետ նախորդ պատերազմից քաղաքացիների հոգնածությունը, և ոչ ոք պատրաստ չէ ռիսկերի»։
«Միևնույն ժամանակ, Հայաստանի ղեկավարն ասում է, որ Ղարաբաղի տալը հնարավոր է միայն տեղի բնակիչների անվտանգության երաշխիքների պահպանման դեպքում։ Ամենայն հավանականությամբ, խոսքը տարածաշրջանի ողջ պարագծի շուրջ ինչ որ պետության զորքերի տեղակայման մասին է, որով հնարավոր կլինի վերահսկել իրավիճակը տարածքում»,- կարծիք է հայտնել փորձագետը։ Զրուցակիցը նաև կասկած է հայտնել, որ խաղաղապահ կոնտինգենտի ռուս զինվորականները կմնան Ղարաբաղում, եթե Երևանը պայմանագիր ստորագրի Բաքվի հետ։
Ավելի վաղ Հայաստանի վարչապետ Նիկոլ Փաշինյանը հայտարարել էր, որ երկիրը պատրաստ է ճանաչել Ադրբեջանի տարածքի 86,6 հազար քառակուսի կիլոմետրը, որը ներառում է նաև Լեռնային Ղարաբաղը։ Միաժամանակ, քաղաքական գործիչը հայտարարել է, որ տարածաշրջանում ապրող հայերի իրավունքների և անվտանգության հարցը պետք է դառնա Բաքվի և Ստեփանակերտի քննարկման առարկան։ Նա նաև նշել է, որ երաշխիքներ են պետք, որ այս տարածքում էթնիկ զտումների և հայերի ցեղասպանության քաղաքականությունը չշարունակվի։ Միաժամանակ, ըստ Փաշինյանի, Բաքուն նույնպես պատրաստ է ընդունել Հայաստանի ամբողջականությունը 29,8 հազար քառակուսի կիլոմետր տարածքով։
Նյութը հրապարակման պատրաստեց Կամո Խաչիկյանը
