Հայաստանը եռում է, բայց Լեռնային Ղարաբաղի հարցը կրկնակի հատակ ունի. Կարինե Գևորգյան
ՎԵՐԼՈՒԾՈՒԹՅՈՒՆՆԵՐ
Tsargrad.tv-ն գրում է, որ Հայաստանի վարչապետ Նիկոլ Փաշինյանը հայտարարել է, որ պատրաստ է Լեռնային Ղարաբաղը ճանաչել որպես Ադրբեջանի մաս։ Սակայն դրա համար կա մեկ պայման՝ Երևանը պետք է ապահով լինի։ Արևելագետ, սոցիոլոգ Կարինե Գևորգյանը «tsargrad.tv»-ին տված հարցազրույցում հստակեցրել է, որ այժմ Հայաստանում, նույնիսկ առանց այդ հարցի էլ «ամեն ինչ եռում է»։
«Փաստն այն է, որ բացի արտաքին քաղաքականությունից, ակտիվորեն քննարկվում է նաև Փաշինյանի որդու առևանգման փորձի պատմությունը։ Սակայն, ինչ վերաբերում է Լեռնային Ղարաբաղին, ապա ճանաչման պայմանները չեն փոխվել: Նա (Փաշինյանը) ոչ մի նոր բան չի ասել, բայց նրա դիրքորոշումը բավականին անորոշ է, քանի որ ինչպես կարելի է հասկանալ, առաջիկայում նա լուրջ խորհրդակցություններ է ունենալու ԵԱՏՄ շրջանակներում»,- ընդգծել է Կարինե Գևորգյանը։
Զրուցակիցը նաև հիշեցրել է, որ ադրբեջանական հայատյացության պայմաններում այնքան էլ տրամաբանական չէ հույս դնել անվտանգության վրա առանց ռուս խաղաղապահների։
Բացի այդ, վերջերս վերականգնվել է Ռուսաստանի և Վրաստանի միջև օդային հաղորդակցությունը, ինչը նշանակում է, որ այնտեղով կարող են անցնել ոչ միայն քաղաքացիական ինքնաթիռներ։ Գևորգյանի խոսքով, այժմ կարելի է բանակցություններ վարել նաև Աբխազիա-Վրաստան-Հայաստան երկաթուղու բացման շուրջ, ընդ որում ներկայումս գործում է Թբիլիսի-Երևան հատվածը: «Հաշվի առնելով այն, որ Ադրբեջանից Իրան նոր երկաթուղի դեռ պետք է կառուցվի, և բացի այդ Ադրբեջանը փաստացի խզել է իր դիվանագիտական և քաղաքական հարաբերությունները Իրանի հետ, կարծում եմ, որ Հյուսիս-Հարավ միջանցքում գտնվող Աբխազիա-Վրաստան-Հայաստան երկաթուղին ավելի վաղ կսկսի աշխատել»,- իր մտքերով է կիսվել Կարինե Գևորգյանը։
Այդ առումով տարածաշրջանում կայունությունն ավելի սուր խնդիր է դառնում, եզրափակել է Գևորգյանը։
Նյութը հրապարակման պատրաստեց Կամո Խաչիկյանը
