«Ապրելու երկիրը» պատրաստ է գլխավորել պայքարը
ՎԵՐԼՈՒԾՈՒԹՅՈՒՆՆԵՐ
«Հայաստանի իշխանությունների վարած անվտանգային ոչ պրոֆեսիոնալ և դիվանագիտական անհետևողական քաղաքականությունը Հայաստանի շուրջ շարունակում է ստեղծել նորանոր վտանգներ, որոնց նկատմամբ դիմադրողականությունը ոչ միայն բավարար չէ, այլ նաև նվազում է»։
«Ապրելու երկիր» կուսակցությունը հայտարարություն է տարածել՝ ներկայացնելով Հայաստանի և Արցախի շուրջ ստեղծված խնդիրների լուծման մասին իր դիրքորոշումը։ Կուսակցությունն ընդգծում է, թե իշխանությունների կողմից Արցախի և Արցախի քաղաքացիների նկատմամբ պարտավորություններից ամբողջական հրաժարումը օր օրի խորացնում է նաև Արցախի շուրջ առկա խնդիրը։
«Այս ամենի պարագայում Ադրբեջանը շարունակում է իր հետևողական քաղաքականությունը հայկականության դեմ՝ փորձելով հասցնել առավելագույն վնասներ Հայաստանին, Արցախին, հայ ժողովրդին։ Ակնհայտ է, որ Հայաստանի իշխանություններն այլևս ի զորու չեն ստանձնել պետության և ժողովրդի նկատմամբ ունեցած նվազագույն պատասխանատվությունը»,- նշել է «Ապրելու երկիրը»։
Կուսակցությունը, ողջունելի է համարել Արցախի քաղաքական ուժերին միասնական պայքարին ուղղված գործողությունները, որոնք պետք է կարևոր դառնան հայկական աշխարհի համախմբման համար։
«Ապրելու երկիրը» փաստում է, որ «Բազմաթիվ օբյեկտիվ և սուբյեկտիվ պատճառներով, առկա իրավիճակից դուրս գալու ճանապարհը բավականին բարդ է ու երկարատև և պատրաստ է առաջնորդել խորքային և բովանդակային փոփոխությունների պայքարը՝ ժողովրդի վստահությանը արժանանալու միջոցով երկրի կառավարումը ձախողած ուժին իշխանազրկելու և ստանձնելու Հայաստանի և Արցախի համար ամբողջական պատասխանատվություն»։
Թերևս նույնիսկ խորհրդարանական տիտղոսային ընդդիմությունը չի համարձակվում նման պատասխանատվություն ստանձնել։ 1,5 տարի խորհրդարանական արտահերթ ընտրութուններից հետո, խորհրդարանական ընդդիմությունը լիովին սպառել է իրեն, իսկ դրսում, դեռ մինչ վերջերս, չէր երևում քաղաքական այն ուժը, որը կկարողանար պատասխանատվություն ստանձնել, հստակ հայեցակարգ ու տեսլական ներկայացնել, թե ինչպես պետք է իշխանազրկել Փաշինյանի ապիկար և դավաճանական ռեժիմին և Հայաստանն ու Արցախը դուրս բերել զարգացման նոր ուղիների։ Միակ քաղաքական ուժը, որը նման համարձակություն ունի, դա «Ապրելու երկիրն» է, որն էլ աներկբա հայտարարում է իր հավակնությունների մասին։
Վահան Բայրամյան
