Մանե Թանդիլյանն արձանագրում է ՔՊ-ի հերթական մարտավարական բլեֆը

«Այս իշխանությունների անպատասխանատվությունը, տգիտությունը, պոպուլիզմի և անգրագիտութունը աղետ են բերել մեզ, սակայն ամենամեծ աղետը հասարակության հիասթափությունն ու ապատիան է»։

«Ապրելու երկիր» կուսակցության նախագահ Մանե Թանդիլյանն է արել այս արձանագրումը։ Նրա խոսքով՝ «Յուրաքանչյուր անգամ ամենաբարդ խնդիրը կարելի է լուծել , եթե կա հավատ սեփական ուժերի նկատմամբ, կա միասնականություն գաղափարի շուրջ և կա գրագետ, պրոֆեսիոնալ թիմ։ Ցավոք սրտի մեզ մոտ կայացած ու պրոֆեսիոնալ մարդիկ հանրային հարթակներում շատ չեն երևում, որովհետև ինքնահաստատվելու և ուրիշների հաշվին կայանալու խնդիր չունեն, բայց դա բերել է նրան, որ պետական և հասարակական հարթակներում առաջ են եկել չկայացածներն ու տգետները, մեր խնդիրն է ժողովրդին ցույց տալ տարբեր ոլորտների իրական առաջատարներին և մենք դա կանենք»,- նշել է Մանե Թանդիլյանը։

Մեկ այլ գրառման մեջ «Ապրելու երկիր» կուսակցության նախագահն անդրադարձել է նաև Երևանի ավագանու ընտրություններին, արձանագրել, թե ««Քաղաքացիական պայմանագրի» քաղաքապետի թեկնածու Տիգրան Ավինյանը վերջին շրջանում ամեն ինչ անում է, որպեսզի անջատվի Նիկոլ Փաշինյանից և «Քաղաքացիական պայմանագիր» կուսակցությունից, սակայն նա ընդամենը հերթական մարտավարական բլեֆն է, որովհետև Տիգրան Աինյանը «Քաղաքացիական պայմանագիր» կուսակցության թեկնածուն է և այդ կուսակցության վարչության անդամ։ Նա Նիկոլ Փաշինյանի և կուսակցության հետ միասին հավասարաչափ պատասխանատու է և մեղավոր, դա փաստ է, որից խուսափել նա չի կարող»,-արձանագրել է Մանե Թանդիլյանը։

Չափազանց կոշտ այս արձանագրումը իր հիմնական մրցակցի նկատմամբ թերևս անխուսափելի էր, գործող իշխանությունները Երևանի ավագանու ընտրություններին ընդառաջ հստակ գիտակցում են, թե ով է իրենց հիմնական մրցակիցը և ումից են վտանգ զգում, ուստի և փաշինյանական քարոզիչների կոհորտան իր հիմնական հարվածներն ուղղում է ոչ թե խորհրդարանական տիտղոսային ընդդիմությանը, այլ հենց «Ապրելու երկրիր» և նրա հնարավոր թեկնածու Մանե Թանդիլյանին։ «Ապրելու երկիրն» էլ բնականաբար ունի ինքնապաշտպանվելու, սեփական գաղափարներն առաջ տանելու և իշխանությանը փաստարկված և լուրջ հարվածներ հասցնելու իրավունք, ինչն էլ առաջիկայում ավելի թեժ է լինելու, քանի որ Երևանի քաղաքապետի ընտրությունները մոտենալուն զուգահեռ ներքաղաքական պայքարը Հայաստանում սրվելու է։ 

Գարիկ Գրիգորյան