«Որոշել եմ ընդառաջ քայլ կատարել». Արցախի Նախագահը՝ Սամվել Բաբայանի կողմնակիցների պահանջի մասին
ՔԱՂԱՔԱԿԱՆՈՒԹՅՈՒՆ
Այսօր Արցախի Հանրապետության Ազգային ժողովի նախագահի կողմից ինձ է փոխանցվել Ստեփանակերտի Վերածննդի հրապարակում տեղի ունեցած հավաքի մասնակիցների հայտարարությունը: Այս մասին հայտնել է Արցախի նախագահ Արայիկ Հարությունյանը:
Նա նաեւ նշել է. «Ելնելով ԱՀ Սահմանադրությամբ իմ ստանձնած պարտավորություններից ու լիազորություններից, հավաքին մասնակցած մեր քաղաքացիների նկատմամբ հարգանքից, հաշվի առնելով լսված լինելու նրանց իրավունքը՝ որոշել եմ ընդառաջ քայլ կատարել: Ուստի, հավաքի ներկայացուցիչներին առաջարկել եմ վաղվանից սկսել քննարկումներ ու խորհրդակցություններ նրանց կողմից ներկայացված առաջարկների ու ծրագրերի շուրջ:
Ինչպես նախկինում, այնպես էլ հիմա պատրաստ եմ օգտագործել յուրաքանչյուրի գիտելիքները և փորձը՝ ի նպաստ մեր երկրի անվտանգության, խաղաղության և մեր ժողովրդի բարօրության:
Միաժամանակ ընդգծում եմ, որ հատկապես այս ճգնաժամային պայմաններում մենք պարտավոր ենք ցուցաբերել զսպվածություն, խոհեմություն և պատասխանատվություն՝ առաջնորդվելով բացառապես Արցախի Հանրապետության ու մեր ժողովրդի շահերով»:
Նշենք, որ այսօր՝ մայիսի 15-ին Ստեփանակերտի հրապարակում Սամվել Բաբայանի կողմնակիցները պահանջ են ներկայացրել Արցախի իշխանություններին պետնախարարի պաշտոնում նշանակել Սամվել Բաբայանին:
