«Կարևոր տարածաշրջան. ԱՄՆ-ը Ռուսաստանին դուրս է մղում Անդրկովկասից»
ՎԵՐԼՈՒԾՈՒԹՅՈՒՆՆԵՐ
Ukraina.ru-ն գրում է, որ Հայաստանի և Ադրբեջանի արտաքին գործերի նախարարներ Արարատ Միրզոյանը և Ջեյհուն Բայրամովը օրերս այցելել են Վաշինգտոն Լեռնային Ղարաբաղում տիրող իրավիճակի շուրջ բանակցություններ վարելու նպատակով։
Իր հարթակում կազմակերպելով Ղարաբաղի շուրջ բանակցություններ ի՞նչ նպատակներ է հետապնդում ԱՄՆ-ը։ Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը նշել է, որ Վաշինգտոնը հետևողականորեն վարում է Ռուսաստանին տարածաշրջանից դուրս մղելու քաղաքականություն։ «Դա արվում է Հայաստանի և Ադրբեջանի միջև խաղաղության պայմանագրի կնքմամբ, բայց պարզ է, որ ներկա իրողություններում նման պայմանագրի կնքումը հնարավոր է միայն Բաքվի պայմաններով, և ամեն ինչ գնում է դրան»,- ասել է նա Ukraina.ru-ի հետ հարցազրույցում:
Փորձագետի կարծիքով դա ամենաուժեղ հարվածը կլինի Ռուսաստանի դիրքերին, քանի որ հայ հասարակությունը կատարվածի համար մեղադրելու է Ռուսաստանին։
Խալաթյանը հավելել է, որ ներկայումս Վաշինգտոնը փորձում է առավելագույնս օգտագործել ռուսական արտաքին քաղաքականության սխալները թե՛ Ղարաբաղում, թե՛ բուն Հայաստանում, որտեղ Մոսկվան չխանգարեց Փաշինյանին մնալ իշխանության ղեկին:
Խոսելով Երևանի և Բաքվի միջև խաղաղության համաձայնագրի ստորագրման հեռանկարների մասին քաղաքագետն ասել է, որ մի կողմից Նիկոլ Փաշինյանը դեմ չէ դրա ստորագրմանը, բայց մյուս կողմից էլ նա մտավախություն ունի, որ իր ստորագրության շնորհիվ Ղարաբաղը կճանաչվի որպես Ադրբեջանի մաս, ուստի էլ երկակի քաղաքականություն է վարում։
«Մոսկվան կփորձի կանխել իրադարձությունների ներկայիս զարգացումը, որը միանշանակ կբերի Անդրկովկասից նրա դուրս գալուն, ուստի Ռուսաստանը կփորձի ճնշում գործադրել Փաշինյանի վրա»,- ասել է Հայկ Խալաթյանը։ Միաժամանակ, նրա կարծիքով, Մոսկվան այլևս չի կարող ազդել Ադրբեջանի վրա։
Նյութը հրապարակման պատրաստեց Կամո Խաչիկյանը
