Ամփոփվում են բնակարաններով ապահովման ծրագրին դիմած շուրջ 5000 հանրային ծառայողների հայտերը. Քաղաքաշինության կոմիտե

Հանրային շուրջ 5000 ծառայող բնակարաններով ապահովման պետական ծրագրից օգտվելու ցանկություն է հայտնել: Պետական համակարգի 43 մարմնից Քաղաքաշինության կոմիտե ներկայացված դիմումների քանակը կրկնակի ավելի է «Կոմիտաս պարկ» թաղամասում հանրային ծառայողներին բնակարաններով ապահովման ծրագրի առաջին փուլով ստացված դիմումներից:

ՀՀ քաղաքաշինության կոմիտեից NEWS.am-ին հայտնում են, որ ներկայում դիմում-հայտերի գրանցման փուլն է: Քաղաքաշինության կոմիտեն աստիճանաբար բոլոր դիմումատուներին էլեկտրոնային համակարգ մուտք գործելու օգտանուն և գաղտնաբառ է տրամադրում՝ հաջորդիվ կիրառելու համար: Ստուգվում է դիմումների համապատասխանությունը ՀՀ կառավարության որոշման պահանջներին, օրինակ՝ արդյոք նախկինում դիմումատուն կամ նրա ամուսինը կնքել է պայմանագիր Քաղաքաշինության կոմիտեի համակարգմամբ իրականացված պետական ծրագրերից որևէ մեկի շրջանակում, կամ տեղափոխվել է պետական համակարգից դուրս աշխատանքի և այլևս հանրային ծառայող չէ, կամ գուցե աշխատավայրը Երևան քաղաքում չէ:

Բոլոր ճշգրտումները, դիմումների գրանցումներն ավարտելուց հետո ծրագրի հավակնորդների ցանկը կհաստատվի Քաղաքաշինության կոմիտեի նախագահի հրամանով և կտեղադրվի կոմիտեի www.minurban.am պաշտոնական կայքում ու www.statemultiapartment.am հարթակում: Այդ մասին դիմումատուները կտեղեկանան նաև՝ իրենց էլեկտրոնային հասցեին ծանուցում ստանալով:

Այնուհետև նախապատրաստվելու է վիճակահանության փուլը, որին մասնակցելու համար որոշմամբ սահմանված կարգով նախատեսված է համապատասխան վճար:

Դիմում ներկայացրած հանրային ծառայողներն իրավունք ունեն նախքան վիճակահանությունը հրաժարվել ծրագրի մասնակցությունից: Կարևոր է նախքան վճարման փուլի մեկնարկը դիմել ծրագրի շրջանակում համագործակցող բանկեր՝ վարկունակությունը գնահատելու համար: Բանկերի առաջարկներին կարելի է ծանոթանալ էլեկտրոնային հարթակի «Փաստաթղթեր» ենթաբաժնում (www.statemultiapartment.am/documents):

Ծրագրի շրջանակում բաշխվելու է 348 բնակարան և նույնքան ավտոկայանատեղի Երևանի Գրիբոյեդով 48 հասցեում կառուցվող «Կոմիտաս պարկ» թաղամասի բազմաբնակարան շենքային համալիրի 5 մասնաշենքից: Ծրագրով նախատեսված է արտոնություն հանրային այն ծառայողների համար, որոնց ընտանիքի անդամը զոհվել է 2020թ. 44-օրյա պատերազմում. նրանց նախընտրած բնակարանը կտրվի առանց վիճակահանության:

Հետագա բոլոր քայլերի մասին ծրագրին դիմողները լրացուցիչ կտեղեկացվեն:

Հիշեցնենք, որ ծրագրի վերաբերյալ ողջ տեղեկատվությունը տեղադրվում է կոմիտեի պաշտոնական կայքի «Ծրագրեր» բաժնում (https://www.minurban.am/hy/hanrayinbn) և www.statemultiapartment.am հարթակում: Հարցերի դեպքում կարող եք զանգահարել Քաղաքաշինության կոմիտեի քաղաքաշինական ծրագրերի իրականացման վարչության բնակարանային ծրագրերի բաժին՝ 011 621 776 և 011 621 714 հեռախոսահամարներով: