Որպես պաշտոնյաներ ի՞նչն է ձեզ խանգարում հայ մնալ, ո՞ւր եք դուք, ինչու կանգնած չեք Արցախի կողքին. Ռուբեն Վարդանյան
ՔԱՂԱՔԱԿԱՆՈՒԹՅՈՒՆԵս կոչ եմ անում ամբողջ հայ աշխարհին կանգնել Արցախի կողքին. ես վստահ եմ, որ դուք մեր կողքին եք, բայց դուք պետք է դա ցույց տաք: Այս մասին այսօր՝ մայիսի 9-ին, Ստեփանակերտում «Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խմբի կազմակերպած հանրահավաքի ժամանակ իր ելույթում ասաց Արցախի նախկին պետնախարար Ռուբեն Վարդանյանը՝ հորդորելով միանալ ստորագրահավաքին:
«Ես հասկանում եմ, որ ՀՀ կառավարությունն ունի խնդիրներ, դուք որպես պաշտոնյա մարդիկ, ինչ-որ սահմանափակումներ ունեք, բայց ի՞նչն է ձեզ խանգարում հայ մնալ, մարդ մնալ, ինչն է խանգարում միանալ այս շատ կարեւոր շարժմանը: Դուք, ձեր երեխաները ինչո՞ւ չեն ստորագրել, ո՞ւր եք դուք: Դուք պետք է կանգնեք ու ցույց տաք, որ հայ եք: Բոլորդ խոսում եք Արցախի մասին ձեր տաք տեղերից, ինչու չենք կանգնած Արցախի կողքին: Արցախի համար պայքարը ամբողջ հայկական աշխարհի համար է»,-ասաց նա:
Ռուբեն վարդանյանը հայտարարեց, որ ճգնաժամը շատ մեծ վտանգ է, բայց նաեւ հնարավորություն է. «Այս ճգնաժամը մեզ հնարավորություն է տալիս մաքրվելու, հասկանալու մեր սխալները, կոփվելու: Այս ճգնաժամն է հնարավորություն տալու այս 30 տարվա սխալները թափել մի կողմ, սկսել նոր կյանքով, նոր ձեւով, արդար, թափանցիկ, որ ժողովուրդն ու պետությունը հավատում են իրար ու միասին են կառուցում մեր անվտանգությունը:
Ես ուրախ եմ այսօր ձեզ ներկայացնել այն աշխատանքը, որ արել ենք վերջին 2 ամսում: Դրանց մասնակցել է 4 կուսակցության ղեկավարություն: Շատերը մասնակցել են քննարկումներին, թե ոնց ենք մենք տեսնում ապագա Արցախը: Մենք ունենք ոչ միայն տեսլականը, այլեւ ճանապարհային քարտեզը, ունենք քայլերի կոնկրետ ցուցակը: Մենք դա փոխանցել ենք եւ նախագահին, եւ ԱԺ նախագահին: Ես ուզում եմ ասել՝ եթե դուք չեք անելու, մենք մեկ է՝ անելու ենք»,-ասաց նախկին պետնախարարը:
Նա նաեւ նշեց, որ այսօր բանակում շատ գործ է արվում, որի մասին մարդիկ տեղյակ չեն. «Պետք է ժողովուրդը հասկանա, թե մենք իրար հետ միասին ինչ ենք անում, շփումը պետք է շատ լինի:
Հայրենական պատերազմն այն է, որ բոլորս զինվոր ենք, իսկական ռազմական իրավիճակ պետք է ստեղծվի, պետք է հասկանանք, որ ուրիշ ձեւ չկա: Այո, մենք պետք է սահմանափակենք որոշ օրենքների իրականացումը»:
