Իշխանության և ընդդիմության վարկանիշները գահավիժում են

Միջազգային հանրապետական ինստիտուտի հարցումները ընդդիմադիր որոշ շրջանակների համար բուռն խանդավառության առիթ են դարձել, փաստում են գործող իշխանությունների և Նիկոլ Փաշինյանի վարկանիշների շեշտակի անկումը, մինչդեռ որևէ խոսքով չեն անդրադառնում նաև խորհրդարանական ընդդիմության երկու ուժերի վարկանիշերի սարսափելի անկման մասին։

Հիշեցնենք, ըստ այդ հարցման, Նիկոլ Փաշինյանը 2023 թվականի մարտի դրությամբ ունի 14 % վարկանիշ, մինչդեռ 2021 թվականի խորհրդարանական ընտրություններում «Քաղաքացիական պայմանագիրը» ստացել է 53 %։

Ավելին, ըստ ամերիկյան հարցման արդյունքների՝ իր վարկանիշով երկրորդ տեղում Արարատ Միրզոյանն է, ընդիմադիր «Հայաստան» դաշինքի ղեկավար Ռոբերտ Քոչարյանի վարկանիշն ընդամենը 2 % է, նույնքան, որքան նախկին վարչապետ Արամ Սարգսյանինը և Ազգային Ժողովի նախագահ, կրկին ՔՊ-ական Ալեն Սիմոնյանինը։

Այս հարցման մեջ առանձնահատուկ աչք է ծակում այն հանգամանքը, որ «ոչ ոքի» պատասխանը տվել է հարցվածների 64 %-ը, ինչը ահռելի է, այսինքն մեր հանրության մի զգալի հատվածը կամ գործող քաղաքական դաշտում չի տեսնում որևէ ուժի և դերակատարի, որին կկարողանա վստահել երկրի կառավարումը, կամ էլ ցանկություն չունի արտահայտելու իր նախասիրությունները ինչ-ինչ պատճառներով պայմանավորված։

Իհարկե, որևէ մեկի համար գաղտնիք չէ, որ Փաշինյանն ու իր քաղաքական թիմը վաղուց չեն վայելում հանրության համակրանքը, ավելին ստեղծված իրավիճակում գնալով խորանում են նրանց նկատմամբ անվստահությունը, անգամ ատելությունը։ Այս հանգամանքը նաև վկայում է գործող տիտղոսային ընդդիմության անձեռնահասության մասին, որ չկարողանալով օգտվել հանրության մեջ կուտակված հակափաշինյանական էներգիայից, իրենք էլ գահավիժում են։

Փաստն այն է, որ Հայաստանին նոր քաղաքական ուժ և նոր քաղաքական գաղափարներ են հարկավոր, Նիկոլ Փաշինյանին իշխանությունից հեռացնելու համար, ինչը հնարավորություն կտա Հայաստանին շնչել և ոտքի կանգնելու քայլեր անել։

Մոնիկա Ալեքսանյան