Զոհասեղանին ՀՀ սուվերենությունն է դրված

ԱԺ-ում կառավարության հետ հարց ու պատասխանի ժամ էր, որին հասարակությանն անհայտ պատճառով ներկա չէր ընդդիմությունը: Էականն այն է, որ ընդդիմությունը պայմանավորված Սյունիքում տիրող իրավիճակով՝ նոր էսկալացիա  (որի արդյունքում հայկական կողմն ունի 4 զոհ և 6 վիրավոր), ադրբեջանցիների անարգել ներթափանցում ՀՀ սուվերեն տարածք՝ (նույնիսկ մինչև բնակիչների բնակարան և այլն), ցանկանում էր հրավիրել փակ նիստ և հարցեր ուղղել  իշխանությանը և մասնավորապես բանակի ղեկավար կազմին:

Այդ նիստը կկայանա, թե ոչ, էական չէ: Սա առիթ էր հարցերն անձամբ Նիկոլ Փաշինյանին ուղղելու: Օրինակ՝ որտե՞ղ է նոր կահավորված առաջնագիծը, բանակի խոստացված բարեփոխումները, մոդուլային կայանները, գերժամանակակից զենքերը, որտեղի՞ց ծնվեց կառավարության նիստում հնչած ապրիլի 1 ամսաթիվը և այլն: Կարևոր է նաև թե ի՞նչ պայմանավորվածություններ կան, առաջիկայում ՀՀ սուվերեն տարածքից ո՞ր բնակավայրն է հանձնվելու, օրինակ մայիսի 1-ին: Այն 29 800քմ  կմ կարմիր գիծ հանդիսացող տարածքից քանի քառակուսին է օկուպացված և այլն: 

Ընդդիմությունն արդեն պետք է հասկացած լիներ, որ երկրում անձիշխանություն է և բոլոր կառույցների փոխարեն որոշումներ է ընդունում մեկ անձ և հենց նրան հարցեր ուղղելու փոխարեն նիստ են հրավիրում և ցանկանում են փակ քննարկմամբ խոսել արդեն որոշում կայացնող երկրորդ օղակի հետ՝ օրինակ Սուրեն Պապիկյանի, ով հայտարարելու է, որ երկրում չի եղել, պետական գաղտնիք են հարցնում, ընդդիմադիրների պնդումները և ներքին ինֆորմացիաներն էլ լկտի սուտ են, մնացածն էլ քննությունը կպարզի և վերջ:

Տարօրինակ է, որ ընդդիմությունը պատրաստ է գնալ փակ հանդիպման, քանի որ նախորդ փակ հանդիպումներից հետո, իշխանությունը ժողովրդի լեզվով ասած, միշտ էլ ինչ-որ բան թողնում է ընդդիմության գրպանում և շահարկում տարիներ շարունակ: Հրաշալի օրինակ է 44-օրյա պատերազմի փակ հանդիպումները, Ապրիլյան պատերազմի քննիչ հանձնաժողովի ժամանակ հայտնած տեղեկությունները և այլն:

Տարօրինակ է, որ ընդդիմությունը հիմա որոշեց Փաշինյանին հարց չտալ, երբ  նույնիսկ այդ հարցերը տալիս էր ԱԺ-ում Փաշինյանի ոչ կոռեկտ պահվածքից հետո: Հիշեցնենք, որ Փաշինյանն ԱԺ-ում ասաց. «Մատ էլ թափ կտամ, որ պետք լինի ուրիշ բան էլ թափ կտամ»:

Սրանից հետո ընդդիմադիրները մի քանի նիստ հարցերն ուղղում էին նախարարներին և ոչ թե Նիկոլ Փաշինյանին, բայց փողոցային պայքարը թողնելուց և Խորհրդարան վերադառնալուց հետո մոռացան եղածն ու սկսեցին հարցեր տալ: 
Հարգելի՛  ընդդիմություն, հենց այս պահին, ձեզ քվե տված քաղաքացիները հարցեր ունեին Նիկոլ Փաշինյանին և նրանք ձեզ գործուղել են ԱԺ, որ դուք այդ հարցերը հնչեցնեք:

Ստատսուսների մակարդակով քննադատությունները տեղին չեն՝ զոհասեղանին ՀՀ սուվերենությունն է դրված:

Աննա Ավետիսյան