Սա իշխանությունների կողմից թիրախավորված արշավ է Դաշնակցության դեմ․ Գեղամ Մանուկյան

ԱԺ նախագահ Ալեն Սիմոնյանի փոխանցմամբ երեկ բռնության է ենթարկվել Նիկոլ Փաշինյանի որդին՝ Աշոտ Փաշինյանը։ Ոստիկանությունից ի պատասխան հայտնում են, որ Փաշինյանը հանցագործության մասին հաղորդում չի ներկայացրել։ ԱԺ նախագահը միջադեպի մեղավորության սլաքներն ուղղում է դաշնակցության կողմը։ Կարևոր է նաև այն, որ Սիմոնյանի այս հայտարարությունից հետո, ավելի շատ քննարկվեց սա, քան այն, որ նա երեկ թքել էր քաղաքացու աչքին՝ իրեն դավաճան անվանելու համար։ Թեմայի վերաբերյալ լրատվականը զրուցել է ԱԺ «Հայաստան» խմբակցության պատգամավոր, դաշնակցական Գեղամ Մանուկյանի հետ։

• Պարո՛ն Մանուկյան, Ալեն Սիմոնյանի վարքը ՀՀ քաղաքացու նկատմամբ ինչպե՞ս կմեկնաբանեք։ Կարո՞ղ ենք Աշոտ Փաշինյանին ենթադրյալ բռնություն գործադրելու հանգամաքը կապել սրա հետ՝ հաշվի առնելով, որ Սիմոնյանը Դաշանակցության մեղավորությունն է ակնարկում։
• Ուղղակի Ալեն Սիմոնյանը չի հասկանում, որ ինքը վաղուց «կլիպներում» կիսամերկ նկարվող դերասան չէ։ Ցավոք սրտի, ժամանակավոր զբաղեցնում է ԱԺ նախագահի պաշտոնը, և այդ դերասանությունն ուղղակի սահմաններ չի ճանաչում։ Կարծես թե, բացի Աժ նախագահի պաշտոնը զբաղեցնելը «02 լրատվականի» աշխատող էլ է։
• ԱԺ նախագահի նման վարքագծից հետո, որքանո՞վ է լեգիտիմ նրա Խորհրդարանը ղեկավարել շարունակելը։
• Այս իշխանությունն իր լեգիտիմությունը կորցրել է շատ վաղուց՝ 2018թ․ հոկտեմբերի 2, երբ գրավեցին Ազգային ժողովը ։ Կորցրին իրենց լեգիտիմությունը 2020թ․ նոյեմբերի 9-ի կապիտուլացիոն համաձայնությունից հետո և այլն։ Տվյալ դեպքում այդ լեգիտիմության ոչնչացման շարունակաությունն է։ Կարենը Կանադայի քաղաքացի է համարվում, բայց տարիներ առաջ մեծ ընտանիքով հայրենիք է վերադարձել, ով նման վերաբերմունքի է արժանցել Սիմոնյանի և թիկնազորի այդ ուղղակի անուղեղ ծառայողների կողմից։ Անուղեղ են, որ Սիմոնյանի անօրինական հրամաններն են կատարում։ Նրանք ՀՀ օրենքներով շարժվող ՊՊԾ աշխատողներ են և ոչ թե Սիմոնյան Ալենի։ Նրանց աշխատավարձը Սիմոնյան Ալենը չի վճարում, այլ հանրության, ինչպես նաև Կարեն Մկրտիչյանի վճարած հարկերից է գոյանում։ Ինչ վերաբերում է Դաշնակցությանը, ապա միշտ էլ վախեցել են, փնովել են։ Կարող եմ հազարավոր օրինակներ բերել թուրքական մամուլից, թուրք պաշտոնյաներից մինչև ադրբեջանցի պատգամավորներ, որոնք ատում են Դաշնակցությանը։ Ցավալի է, բայց հիմա յան-ով վերջացող ազգանուն ունեցողների մեջ էլ է դա նկատվում։
• Աշոտ Փաշինյանի հետ ենթադրաբար տեղի ունեցած միջադեպի սլաքներն էլի ուղղվում են Դաշնակցության կողմը։ Ինչո՞ւ։
• Նորից եմ ասում՝ Ալեն Սիմոնյանը «մլիցա՞» է, թե՞ ԱԺ նախագահի պաշտոն զբաղեցնող։ Աշոտ Փաշինյանը հաղորդում չի ներկայացրել, բայց որ ԱԺ նախագահի անունից նման հայտարարություն է լինում ոստիկանությունը պարտավոր է գործընթաց սկսել։ Իսկ սլաքներ ուղղելը զուտ հակադաշնակցական մոլուցք է։ Աշոտ Փաշինյանը, եթե որևէ տեղ, չգիտեմ ինչ հոգեվիճակում ծեծ է կերել, Դաշնակցությունն ի՞նչ կապ ունի։ Սա իշխանությունների կողմից թիրախավորված արշավ է Դաշնակցության դեմ, որը հասկանալի է, քանի որ Դաշնակցությունը նրանց կոկորդին է մնացել, դիմադրում է, դեմ է կանգնում այս կապիտուլացիոն իշխանության ամենախայտառակ գործողություններին։ Դաշնակցությունն այս օրերին «Հայաստան» խմբակցության պատգամավորներով արձանգանքում է Տեղ գյուղում տեղի ունեցողին, երբ թշնամին կարողանում է մուտք գործել ՀՀ տարածք: Եվ վերջապես սա հայտնի քարավանի պատմությունն է՝ մինչ Ալեն Սիմոնյանն իրեն անդաստիարակի պես պահում էր Երևանի փողոցներում ու Դաշնակցության դեմ վայրահաչում, այդ ընթացքում տասնյակներով երիտասարդներ, երեկ Սարդարպատում Դաշնակցության անդամագրման երդումը տվեցին։