Ինչ Նիկոլի մտքին է, Գագիկ Մելքոնյանի լեզվի ծայրին է
ՎԵՐԼՈՒԾՈՒԹՅՈՒՆՆԵՐ
Ռուսաստանյան առաջատար լրատվամիջոցներն ու փորձագիտական հանրությունը չէր կարող չնկատել «Քաղաքացիական պայմանագիր» խմբակցության տխրահռչակ պատգամավոր Գագիկ Մելքոնյանի անհեթեթ և վտանգավոր հայտարարությունները։
Եվ գրեթե բոլորն էլ հասկանում են, որ Մելքոնյանը չէր խոսի ՌԴ նախագահին Հայաստանում կալանավորելու հնարավորության մասին առանց Նիկոլ Փաշինյանի անմիջական հրահանգի։ Հիշեցնենք, Մելքոնյանը երեկ հարցազրույց էր տվել, անդրադարձել Հռոմի ստատուտին և Վլադիմիր Պուտինի դեմ կալանքի օրդերին, ու ասել. «Մոսկվային թվում է՝ մինչև հիմա մենք կախված ենք իրենցից: Իրենք մեզ անկախ չեն տեսել երբեք»:
Դիտարկմանը, որ փաստորեն Հռոմի ստատուտի վավերացմամբ եթե ՌԴ նախագահը այցելի Երևան, Հայաստանը պարտավոր է ձերբակալել նրան, Մելքոնյանը պատասխանել էր. «Նախ ինքը չի գա, ոչ էլ Հայաստանը իրեն կձերբակալի: Եթե մենք մտնում ենք էդ պայմանավորվածությունների մեջ, ուրեմն պետք է կատարենք մեր պարտականությունները։ Ես ուզում եմ, որ չգա: Եթե մենք ստորագրել ենք այս փաստաթուղթը, ավելի լավ կլինի չգա: Եթե եկավ Հայաստան, պետք է կալանավորվի»։ Գագիկ Մելքոնյանն առանձնապես մտավոր ընդունակություններով չի փայլում, ինչպես և իր իշխանական գործընկերների գրեթե ամբողջ կազմը, սակայն Մելքոնյանը երբեք ոչինչ չի ասում առանց Նիկոլ Փաշինյանի անհատական հանձնարարության, ու ռուսական կողմն էլ վստահ է՝ նման անհեթեթ հայտարարության հեղինակն իրականում Փաշինյանն է։
«Ոչ բարով» գեներալը ժամանակին ՊՆ փոխնախարար է եղել թիկունքի գծով, լուրջ կապեր ունեցել ՌԴ ՊՆ-ի և ԳՇ-ի հետ, ուստի նման հակառուսական հայտարարության համար Փաշինյանը պետք է շոշափելի կոմպրոմատներ ունենա նրա դեմ։ Ուշագրավն այն է, որ Գագիկ Մելքոնյանը ժամանակին բիզնեսներ է դրել, հիմա էլ ունի ՌԴ-ում։ Եվ ռուս իրավապահները ակտիվորեն սկսել են քրքրել դոսյեները։
Գիտակցում են, իհարկե, որ Մելքոնյանը ընդամենը խամաճիկ է Նիկոլ Փաշինյանի ձեռքում, սակայն դա նրան չի փրկելու պատժից և անձնական կոշտ պատասխանատվությունից։
Ի դեպ, Փաշինյանն ինքն էլ դեմ չի լինի իր իսկ ձեռամբ փուռը գնացած Մելքոնյանի պատժին։ Նախ, դա հնարավորություն կտա ազատվել վայ-գեներալից, ապա և հիշել 5-րդ շարասյան մասին, ասել, թե նա ներդրված է եղել «Քաղպայմանագրի» շարքերում։
Լիլիթ Զուրաբյան
