Փաշինյանն ասում է՝ խաղաղության պայմանագիր լինելու է, բայց խճճվել է «ոնց»-ի հարցում

Հայաստանի վարչապետի աթոռը մաշացնող Նիկոլ Փաշինյանը երեկ կառավարության նիստում հայտարարել է, թե խաղաղության պայմանագիր լինելու է։ Նման մի հայտարարություն էլ արել է արդեն երեկոյան, թվիթերյան իր էջում, ընդ որում երկու այս հայտարարությունների մեջ բավական ուշագրավ շերտեր կան, որոնք վկայում են հենց Նիկոլ Փաշինյանի վախերը։ Եթե կառավարության նիստի ընթացքում Նիկոլ Փաշինյանը հայտարարել է, թե խաղաղության պայմանագիր լինելու է և լինելու է մինչ օրս բարձրագույն մակարդակներում ձեռք բերված գրավոր փաստաթղթերի վրա, ապա արդեն թվիթերյան գրառումը ուշագրավ այլ ձևակերպում է պարունակում։

«Հայաստանի և Ադրբեջանի միջև կկնքվի խաղաղության պայմանագիր և այն հիմնված կլինի բարձրագույն մակարդակներում ձեռք բերված պաշտոնական հայտարարությունների վրա»։ Եթե առաջին դեպքում հստակ նշվում էր գրավոր փաստաթղթերը, որոնք ստորագրված են և հայտնի բոլորի համար, ապա արդեն երկրորդ դեպքում միայն գրավոր բառը բացակայում է, փոխարենը «պաշտոնական հայտարարություն» արտահայտությունն է արվում։

Ըստ էության, Նիկոլ Փաշինյանը փոխել է իր իսկ ձևակերպումը, ինչ որ ուժերի քաղաքական ճնշումների ներքո։ Չի բացառվում, որ հենց թուրք-ադրբեջանական տանդեմի, որոնք ամեն ինչ անում են գրավոր փաստաթղթերից անդին, այլ զիջումներ Հայաստանից կորզելու։ Ուստի բնավ զարմանալի չէ, որ տևական ժամանակ համառ լուրեր են շրջանառվում, թե Փաշինյանը բացի գրավոր պայմանավորվածություններից, նաև բանավոր պայմանավորվածություններ ունի թշնամու հետ։

Նիկոլ Փաշինյանը երեկ կառավարության նիստում հայտարարել է, թե Լեռնային Ղարաբաղի հակամարտությունը չի կարգավորվում, քանի որ Ադրբեջանը կասկածի տակ է դնում Հայաստանի գոյության իրավունքը։ Թե այս պարագայում ինչպես է Նիկոլ Փաշինյանն ու իր թիմը պատկերացնում Ադրբեջանի հետ խաղաղության պայմանագրի կնքումը, Փաշինյանն այդպես էլ որևէ բացատրություն չի ներկայացրել, կրկին, ընդամենը դիմել է միջազգային հանրությանը՝ Ադրբեջանին խաղաղության պայմանագրի պարտադրելուն, իսկ Ադրբեջանը , թերևս, պարզ է և հասկանալի, որ ցանկություն չունի կանգ առնելու և շարունակելու է Հայաստանից նորանոր զիջումներ կորզել։

Անի Մուրադյան