Ինձ մոտ ողջամիտ կասկած է առաջանում, որ նպատակը շատերին լիցենզիայից զրկելն է կամ իրենց մարդկացով լցնելը. Արմենուհի Կյուրեղյան

ՀՀ առողջապահության նախարարությունն առաջարկում է չեղարկել որոշումը բուժհաստատությունների անժամկետ լիցենզավորման մասին։ Այս մասին Ազգային ժողովի նիստում, «Լիցենզավորման մասին» օրենքում լրացումներ կատարելու մասին օրինագծի քննարկման ժամանակ, մարտի 21-ին ասել է գերատեսչության ղեկավար Անահիտ Ավանեսյանը։

Նախկին կարգավորումն առաջարկվում է փոխարինել 5 տարով լիցենզիա տալով։ Փոփոխության նպատակը, նրա խոսքով, պրոֆեսիոնալ կադրերի մշտական առկայության ապահովումն է։ Իշխանություններն ուշադրությունից դուրս չեն թողնի նաև բուժհաստատությունների նյութական բաղադրիչը։  Թեմայի վերաբերյալ հարցեր ենք ուղղել ԱԺ առողջապահության և սոցիալական հարցերի մշտական հանձնաժողովի անդամ, ընդդիմադիր պատգամավոր Արմենուհի Կյուրեղյանին։

-Տիկի՛ն Կյուրեղյան, նախագծի վերաբերյալ ի՞նչ դիտարկումներ ունեք։

-Մի կողմից ներկայացնում են սարքավորումների արդիականացման անհրաժեշտությունը, իսկ մյուս կողմից՝ մասնագետների վերապատրաստման մասին են խոսում։ Ասում են, եթե կազմակերպությունները չհամապատասխանեն կառավարության կողմից ներկայացված պահանջներին, ապա կզրկվեն լիցենզիայից։ Այս օրենքի նախագծով այդ նպատակին հասնելու իրենց գործողությունները բացարձակ հիմնավոր չեն։ Նախ ընդգծենք, որ չունենք ոչ արդիկան սարքավորումների սահմանումը, չկա չափորոշիչներ՝ հասկանալու համար սարքավումը հնացած է, թե ոչ։ 

-Արդյո՞ք ՇՄԶ կրեդիտավորման համկարգը չի լուծում մասնագետների վերապատրաստման հարցը։

-Այո՛, այդ համակարգն արդեն իսկ գործատուից պահանջում է պայմանագիր կնքել այն մասնագետների հետ, ովքեր հավաքում են այդ կրեդիտները։ Այսինքն աշխատողն արդեն պարտավոր է վերապատրաստվել և հավաքել այդ միավորները։ Այս առումով հարցը լուծված է։ Իրենք ասում են, որ պետք է նաև կազմակերպությունը կոնկրետ ոլորտի համար ապահովի իքս քանակությամբ մասնագետը և դրա համար ՇՄԶ-ն քիչ է։

Ըստ նախագծի՝ նախորդ 30 տարիների ընթացքում լիցենզավորված բոլոր կազմակերպությունները, որոնք լիցենզիա էին  ստացել անժամկետ, պետք է անցնեն լիցենզավորում  և օրենքը ժամկետային սահմանումներ է դրել, թե կոնկրետ կազմակերպությունները որքան ժամանակում պետք է անցնեն վերալիցենզավորում։

Լիցենզավորման մարմինն այդ գործընթացը պետք է կազմակերպի 23 օրվա ընթացքում, ապա հարց է առաջնում, դա լրացուցիչ ծախս չի ենթադրո՞ւմ։ Մեզ ասում են, որ նոր ֆինանսական և մարդկային ռեսուրսներ չեն ներգրավվելու։ Սա արդեն կասկածի տակ է դնում նպատակը, քանի որ հնարավոր չէ եղած ներուժով իրականացնել 30 տարվա կազմակերպությունների վերալիցենզավորումը, ռեալ չէ։ Նախագծում նաև նշում են, որ այս ծրագիրն  իրենց կառավարության ռազմավարական ծրագրերից չի բխում, իսկ ոլորտում այդ թղթից բխող շատ գործ կա անելու, ապա ինչու դա չեն անում։ Ամենալուրջ խնդիրը Սահմանարության հետ հակասությունն է, որի 73,74-րդ հովածներում նշվում է, որ եթե օրենսդրական փոփոխությունն ազեցություն է ունենում վատթարացման առումով, ապա այդ օրենքը հետադարձ ուժ չի ունենում։ Երբ հարցը բարձարցրեցի հանձնաժողովի նիստում, մի փոքր վերաձևակերպում տեղի ունեցավ։ Այս առումով դատարաններ շատ գործեր են գնալու։

-Չեք կարծում, որ նախագիծը կարող է միտված լինել կոնկրետ բուժհաստատությունների դեմ։

-Այո՛, ես նման ողջամիտ կասկած ունեմ։ Այն կազմակերպությունները, որոնք չեն հասցնի թարմացնել իրենց սարքավորումները նշված ժամկետներում, ապա կզրկվեն լիցենզիայից։ Պատկերացնո՞ւմ եք, թե այն ինչ ֆինասկան բեռ է դնում հատկապես մարզային ԲԿ-ների վրա։ Շատ կազմակերպություններ վերալիցենզավորման հնարավորությունը կորցնելու են։ Ինձ մոտ ողջամիտ կասկած է առաջանում, որ նպատակը շատերին լիցենզիայից զրկելն է կամ իրենց մարդկացով լցնելը, գուցե նաև այդ կազմակերպությունների շենք-շինությունները վաճառելը։

Նման կասկած ինձ մոտ առաջացել է, քանի որ արեն տեսել եմ այս իշխանության վարած քաղաքականությունը նմանատիպ հարցերում՝ ծննդատների փակում, բուժհաստատությունների օպտիմալացում, լուծարում և այլն։ Երբ այս մտահոգությունների մասին կիսվել եմ՝ իրենց վերալիցենզավորման գործընթացը սկսելու 6 ամսյա ժամկետը, դարձրել են 1 տարի։ Ըստ իրենց՝ այդ թերությունները կհասցնեն վերանայել։

-Այդ լրացուցիչ սարքավորումների և այլնի բեռը, երբ դրվի ԲԿ-ների վրա, այն չի՞ ավելացնի նաև բուժառուների ֆինանսական բեռը։

-Միանշանակ։ Այդ կազմակերպությունը  ստիպված է լինելու փոխել իր սարքավորումն ինչ-որ չափանիշի համապատասխանեցնելու համար, որն էլ նաև լրացուցիչ մասնագետի վերապատրաստման ծախս է ավելացնելու։ Կա՛մ ի վիճակի չեն լինելու այդ ծախսերն իրականացնել և զրկվելու են լիցենզիայից, կա՛մ  իրականացնելով նման ծասեր դա հանելու են պացիենտի գրպանից։ 

Աննա Ավետիսյան