Ադրբեջանական սադրանք ռուսների դեմ. Սյունիքում զինծառայողի մոլորվելու պատմությունը

Սյունիքի մարզում զինծառայողի մոլորվելու և դրան հաջորդող իրադարձությունները դետեկտիվ ժանրի պատմություն են հիշեցնում։

Նշենք, որ պաշտպանության նախարարությունը երեկ հայտնեց, որ հայտնաբերվել է զինծառայողը, նրա կյանքին վտանգ չի սպառնում։ Մարտիրոս Գյուլամբարյանը Հայաստան վերադառնալուց հետո պատմել է, որ անհետացել էր Սյունիքի մարզի Վերիշեն բնակավայրից ոչ հեռու գտնվող տարածքում։ Թեպետ տեղեկություններ էին շրջանառվում, թե ադրբեջանցիները նրան առևանգել են, Գյուլամբարյանը հայտնել է, թե խիտ մառախուղի պատճառով իր վարած «Կամազ» մեքենայով հայտնվել է ադրբեջանական դիրքերի մոտ, կարողացել դուրս գալ մեքենայից և թաքնվել, թեպետ ամբողջ գիշեր լուսարձակները և անօդաչուով փնտրել են իրեն, պառկել է գետնին և ձնով է ծածկվել։

Գյուլամբարյանին հաջողվել է դուրս գալ ադրբեջանցիների կողմից վերահսկվող տարածքներից, սակայն բեռնատարը մնացել է ադրբեջանցիների մոտ, հրաժարվում են վերադարձնել և այժմ ռուսական կողմի միջնորդությամբ բանակցություններ են ընթանում։ Երեկ նաև տեղեկություն տարածվեց, որ Գորիսի բժշկական կենտրոն է դիմել ազգությամբ երկու ռուս զինծառայող՝ գլխի շրջանում թեթև մարմնական վնասվածքներով՝ ոչ հրազենային։

Նրանք բուժօգնություն են ստացել և դուրս գրվել հիվանդանոցից։ Վարչապետ Նիկոլ Փաշինյանին պատկանող թերթը տեղեկություններ է հայտնել ռուս սահմանապահների հետ տեղի ունեցած միջադեպից։ Ըստ այդմ, ռուս սահմանապահները փորձել են միջնորդել մոլորված պայմանագրային զինծառայողին ադրբեջանցիների վերահսկվող տարածքից հետ վերադարձնելու համար։ Եղել է պայմանավորվածություն ռուսների և ադրբեջանցիների միջև։

Ռուսական «Ուազ» մակնիշի ամենագնացը ռուսական դրոշով ու խաղաղապահի տարբերանշանով մուտք է գործել ադրբեջանցիների կողմից վերահսկվող տարածք, որից հետո մեքենայի վրա ադրբեջանցիները կրակ են բացել, ինչն էլ պատճառ է դարձել ռուս երկու զինծառայողների մարմնական վնասվածքների համար։ Տարածվող տեղեկություններն ու կցկտուր մեկնաբանությունները փաստում են, որ որոշակի շրջանակների կողմից միտում է եղել ադրբեջանցիների կողմից ռուսների գնդակոծումը ծածկադմբոց անելու և իրավիճակն ավելի չթեժացնեու, թերևս սա կարելի է համարել առաջին լուրջ միջադեպը ռուսների մասնակցությամբ, երբ ադրբեջանցիները նույնիսկ պայմանավորվածություն ունենալու պարագայում ուղիղ կրակ են բացել ռուսների վրա և միայն երջանիկ պատահականությամբ ռուս զինվորները հրազենային վնասվածքներ չեն ստացել։

Առայժմ հայտնի չէ, թե ինչպես կարձագանքի ռուսական կողմը, սակայն տեղեկության տարածումը հենց վարչապետի ընտանիքի կողմից վկայում է , որ Հայաստանի իշխանությունները մտադիր են ամեն կերպ լայն հրապարակայնություն հաղորդել այս միջադեպին։

Արտյոմ Ամիրաղյան