Փաշինյանի վարկանիշը երկու ամսում նվազել է

Հայաստանի գործող իշխանությունները տևական ժամանակ տարբեր հարցումներ են անում հանրության շրջանում պարզելու իրենց իրական վարկանիշները։ Հարցումներ են իրականացնում նաև ընդդիմադիր քաղաքական ուժերը՝ փորձելով հասկանալ, թե ինչ զարգացումներ կարող են լինել երկրում։

Մեր տեղեկություններով՝ այս տարեսկզբից արդեն 2 հարցում է արվել Հայաստանում, երկուսն էլ գործող վարչախմբի պատվերով, որոնք իրականացվել են միջազգային հեղինակավոր ընկերությունների կողմից։ Հատկապես Երևանի քաղաքապետի ընտրություների նախօրեին, փաշինյանական վարչախմբին չափազանց հետաքրքրում է իրենց իսկ ունեցած վարկանիշը և քաղաքապետի ընտրություններում հնարավոր անակնկալները։

Մեր աղբյուրը, որը համադրել է այդ երկու հարցումները, բավականին տխուր պատկեր է արձանագրել փաշինյանական վարչախմբի համար։ Երկու ամսվա ընթացքում Նիկոլ Փաշինյանի անձնական վարկանիշը նվազել է 6 տոկոսով, փոխարենը 17 տոկոսով ավելացել է բացասական վարկանիշը՝ հասնելով 39 տոկոս։

Հարցվածների այդքան մասը փաստել է, որ որևէ պարագայում ցանկացած ընտրության դեպքում չի քվեարկի Նիկոլ Փաշինյանի օգտին։ Բացի այդ, ևս 12 տոկոսն էլ նշել է, թե ավելի շուտ ձայն չի տա Նիկոլ Փաշինյանին և նրա գլխավորած քաղաքական ուժին։

Ըստ էության, հանրության 51 տոկոսը լիակատար կամ մասամբ դեմ է Նիկոլ Փաշինյանի պաշտոնավարմանը։ Նույն այդ հարցումների համաձայն՝ Նիկոլ Փաշինյանի դրական ռեյտինգը Հայաստանի տարածքում 21-22 տոկոսից չի անցնում, ընդ որում Երևանում այդ ցուցանիշը շատ ավելի ցածր է՝ 16-17 տոկոս։ Աս տվյալները լրջորեն մտահոգել են իշխանություններին, որոնք գիտակցում են, որ կարող են ձախողվել Երևանի քաղաքապետի ընտրություններում, այլև այլ քաղաքական զարգացումներին։ 

Սոսե Ավագյան