ԱԳ նախարարի այցը Մոսկվա վտանգավոր էր և ձախողված

Հայաստանի արտգործնախարար Արարատ Միրզոյանի այցը Մոսկվա և հանդիպումը ՌԴ արտգործնախարար Սերգեյ Լավրովի հետ կարելի է ձախողված և վնասակար համարել։ Մասնավորապես, երկու կողմերի հռչակած նարատիվներից հետևում է, որ Հայաստանն ու Ռուսաստանը բացարձակ այլ պատկերացումներ ունեն թե՛ Արցախի հարցի կարգավորման և թե՛ հայ-ռուսական հարաբերությունների հետագա բարելավման ուղղությամբ։

Մինչ Ռուսաստանի արտգործնախարարն իր խոսքում շեշտում էր Հայաստանում ռուսական դպրոցներ բացելու, հավանություն էր տալիս Նիկոլ Փաշինյանի արտահայտած մտքին Ստեփանակերտի և Բաքվի միջև երկխոսության մեխանիզմներ ներդրելու մասին, նաև առաջին անգամ պաշտոնական դիրքորոշում հայտնում այդ գաղափարի վերաբերյալ, Հայաստանի արտգործնախարարը բացարձակ այլ պնդումներ էր անում։

Համատեղ ասուլիսում Սերգեյ Լավրովը հայտարարել է, թե աջակցում է Հայաստանի վարչապետի հայտարարությանը, որ Լեռնային Ղարաբաղի բնակչության իրավունքների և անվտանգության երաշխիքների հարցերը պետք է լուծվեն Ղարաբաղի ներկայացուցիչների և Բաքվի միջև։

Նա, մասնավորապես, հիշեցրել է Մինսկի համաձայնություններն Արևելյան Եվրոպայի բնակիչների համար, ինչպես նաև 10 տարի առաջ Բելգրադի և Պրիշտինայի միջև ստորագրված համաձայնագիրը, Կոսովոյի սերբական տեղական ինքնակառավարման մարմինների ստեղծման մասին։ Սերգեյ Լավրովն առիթը բաց չի թողել մեղադրանքի սլաքները ուղղելով Արևմուտքի կողմը՝ նրանց մեղադրելով ռեյդերական գործողություններ կատարելու և Հայաստանին և Ռուսաստանին իրար հետ կռվեցնելու մտադրության մեջ։

Ռուսաստանի արտգործնախարարն ակնհայտորեն հունից դուրս եկավ, երբ հայկական կողմից նրանց հարց տվեց հանրային հեռուստաընկերության լրագրողը։ Ակնհայտորեն Հայաստանի ԱԳՆ-ի հետ համաձայնեցված այդ հարցից հետո նույնիսկ շրթունքների շարժումից կարելի էր ենթադրել, որ Սերգեյ Լավրովը պարզապես հայհոյանք է ցանկանում հնչեցնել։

Մինչ Լավրովը ներկայացնում է ռուսական կողմի դիրքորոշումները՝ Արարատ Միրզոյանը կրկին փորձել է նուրբ դիվանագիտական ակնարկներով մեղադրանքներ հնչեցնել Ռուսաստանի հասցեին։ «Ամենևին չնվազեցնելով ՌԴ դերակատարությունը՝ տվյալ իրավիճակը ցույց է տալիս միջազգային մասնակցությամբ ցեղասպանության կանխարգելման և միջազգային դիտորդական և փաստահավաք առաքելության ուղարկելու կարևորությունը Լեռնային Ղարաբաղ»,-հայտարարել է Հայաստանի արտգործնախարար Արարատ Միրզոյանը։

2,5 տարի նշված տարածքի անվտանգության երաշխավորը Ռուսաստանն է և այսօր ՌԴ արտգործնախարարի ներկայությամբ նման բան հայտարարելը վկայում է, որ Հայաստանի իշխանությունները պարզապես սադրանքի են գնում՝ սրելով հարաբերությունները Մոսկվայի հետ։

Մինաս Ազատյան