ՀԱՊԿ-ը սկսել է աշխատել հայ հասարակության հետ

ՀԱՊԿ գլխավոր քարտուղարը Հայաստանում էր: Նա այցելեց Եռաբլուր, ապա Ջերմուկ: Հատկանշական է, որ այցը Հայաստան այն դեպքում էր, երբ պաշտոնական Երևանը հրաժարվեց ՀԱՊԿ-ի փոխքարտուղարի քվոտայից:

Բացի այդ էլ, ՀՀ-ն հստակ դիրքորոշում է արտահայտում արտաքին քաղաքական վեկտորի փոփոխության վերաբերյալ: ՀԱՊԿ գլխավոր քարտուղարի այցը կարող է ունենալ երկու հիմնական դրդապատճառ: Այնպիսի տպավորություն է, որ ՀԱՊԿ-ը սկսել է աշխատել հայ հասարակության հետ և հիմա նրա քայլերը միտված են հայ հասարակության վստահությունը վերականգնելուն: Դա ամենևին չի նշանակում՝ ՀԱՊԿ-ի հարաբերությունները պաշտոնական Երևանի հետ կարգավորվել են, ու խնդիրները հաղթահարվել են: Բանն այն է, որ Հայաստանը գտնվում է աշխարհաքաղաքական մրցակցության կիզակետում: Բոլոր ուժային կենտրոններն այժմ փորձում են իրենց դիրքերն ամրացնել Հայաստանում` լուծելով որոշակի խնդիրներ: Այս իմաստով ՀԱՊԿ-Հայաստան հարաբերությունների խզումը` ՀԱՊԿ-ից Հայաստանի դուրս գալը մեծ հարված է հենց նույն ՀԱՊԿ-ին` տարածաշրջանային անվտանգության համակարգին:

ՀԱՊԿ-ն տարածաշրջանում մնալու համար պայքարում է: Որքան ՀԱՊԿ-ն է անհրաժեշտ Հայաստանին, այդքան էլ Հայաստանն է ՀԱՊԿ-ին անհրաժեշտ: Ադրբեջանին ու Վրաստանին միանալու հեռանկար այս պահին ՀԱՊԿ-ը չունի, այդ իսկ պատճառով էլ Հայաստանին ամեն կերպ փորձելու են պահել ՀԱՊԿ-ի շրջանակներում:

Եթե ՀՀ-ն կարողանա ճիշտ գնահատել ՀԱՊԿ-Արևմուտք պայքարը Հայաստանի համար, ապա կկարողանա հմուտ դիվանագիտության շնորհիվ հասնել նրան, որ երկու վեկտորներից էլ օգուտներ քաղի: Սակայն հիմա Հայաստանի իշխանությունն արտաքին քաղաքական վեկտորի փոփոխությանն ուղղված գործնական բազում քայլեր է ակնհայտ ցուցադրում: Հրաժարվում է ՀԱՊԿ-ի զորավարժություններից, փոխարենը Հայաստան է բերում ԵՄ դիտորդներին: Սա դուր չի գալիս նաև Իրանին, քանի որ Արևմուտքի ռազմական ներկայությունը տարածաշրջանում խնդրահարույց է նաև Իրանի համար:

Ստացվում է՝ տարածաշրջանում միայն ՀՀ-ին հարմար չէ ՀԱՊԿ-ի հետ աշխատելը, որը էական խնդիրներ է առաջացնելու: Այս դեպքում, եթե մեղմ քաղաքականության արդյունքում ՀԱՊԿ-ը չհասնի իր ցանկալի արդյունքին, ապա Իրանը ևս սկսելու է ընդդիմանալ ՀՀ իշխանության քայլերին, և այդ պարագայում Հայաստանը ևս մեկ պոտենցիալ դաշնակից կկորցնի:

Աննա Ավետիսյան