Տարածաշրջանում այս պահին կայունություն պահելը բխում է Ռուսաստանի շահերից

Ադրբեջանի նախագահ Իլհամ Ալիևը,  ելույթ ունենալով Անկարայում անցկացված թյուրքական երկրների կազմակերպության գագաթնաժողվում, հիշեցրել է 44-օրյա պատերազմում Ադրբեջանին ցուցաբերած Թուրքիայի օգնությունը, ինչպես նաև անդրադարձել է իր իսկ կողմից հռչակած Զանգեզուրի միջանցքի չբացելուն՝ մեղադրելով հայկական կողմին:

«Հայաստանը խուսափում է նաև Զանգեզուրյան միջանցքը բացելու պարտավորությունից՝ խախտելով 2020 թվականի նոյեմբերի հայտարարության պայմանները և պետք է դրա համար պատասխանատվություն կրի»,- հայտարարել է Ալիևը։

Նոյեմբերի 9-ի հայտարարությունում, սակայն, «Զանգեզուրյան միջանցք» արտահայտությունը չկա, խոսքը Ադրբեջանի արևմտյան շրջանները Նախիջևանին կապող ճանապարհները վերաբացելու մասին է։ Այս տարվա սկզբին ադրբեջանական լրատվամիջոցներին տված մեծ հարզազրույցում Ալիևը ասել էր, որ «Զանգեզուրյան միջանցքը» ինքն է շրջանառության մեջ դրել։

Այս արտահայտություններից հետ ՌԴ նախագահ Վլադիմիր Պուտինը զանգահարել է Ալիևին: ՌԴ պաշտոնական  կայքը հակիրճ հաղորդագրություն է տարածել: «Քննարկվել են Հարավային Կովկասում անվտանգության և կայունության ապահովմանն ուղղված գործնական միջոցառումներ՝ Ռուսաստանի, Ադրբեջանի և Հայաստանի ղեկավարների միջև հայտնի եռակողմ պայմանավորվածություններին համապատասխան։ Մտքերի փոխանակություն է տեղի ունեցել նաև տարածաշրջանում տրանսպորտային, լոգիստիկ և տնտեսական կապերի զարգացման շուրջ», - ասվում է հաղորդագրությունում։

Ադրբջանական կայքերն էլ հայտնում են, որ Պուտինն է զանգահարել Ալիևին: Ինչո՞ւ. տարածաշրջանում այս պահին կայունություն պահելը բխում է Ռուսաստանի շահերից, ուստի առայժմ նույնիսկ զիջումների է գնում: Այն, որ Պուտինը ստիպված է զանգահարել Ալիևին և նրա հետ ինչ-որ հարցում ընդհանուր հայտարարի գալ, դրանում ևս իր մեղքի բաժինն ունի հայկական կողմը: Մինչ այս ապակայունացված աշխարհաքաղաքական իրավիճակը,Պուտինն Ալիևին ասում էր, թե ինչ պետք է անի կամ չանի, իսկ հիմա ինչ-որ բան է քննարկում: Իհարկե, այս վիճակը պայմանավորված է ՌԴ պետական շահով, քանի որ պատերազմի երկրորդ ճակատ բացելը չի բխում ՌԴ-ի շահերից:

Պետք է ընդունել, որ Ռուսաստանի և Հայաստանի շահերն այստեղ համընկնում են, ուստի կարիք կա համագործակցելու, իսկ ՀՀ իշխանությունը դեռ չի հասկացել, որ ավելի լավ է Ռուսաստանի նման վատ բարեկամ ունենալ, քան նրա նման թշնամի:

Աննա Ավետիսյան