Ինչո՞ւ գնալ մի տեղ, որտեղ անցակալի ես
ՎԵՐԼՈՒԾՈՒԹՅՈՒՆՆԵՐ
Վալերի Բրյուսովի անվան պետական լեզվաբանական համալսարանի շուրջ կրքերը չեն հանդարտվում: Մարտի 15-ին արդարադատության նախարարի հրամանով և օրենքի ուժով Բրյուսովի համալսարանի 3 հոգանոց խորհուրդ ստեղծվեց, որի կազմը ղեկավարում է ԿԳՄՍ նախարար Ժաննա Անդրեասյանը: Այդ խորհուրդն էլ այսօր ռեկտորի ԺՊ է նշանակել չընտրված ռեկտոր, Լեզվի պետական կոմիտեի նախագահ Դավիթ Գյուրջինյանին:
Ուսանողները և դասախոսական անձնակազմը դասադուլ և գործադուլ էին անում՝ հայտարարելով, որ չեն ուզում Գյուրջինյանին տեսնել իրենց բուհի ռեկտորի դերում, համաձայն չեն և չեն կիսում այն ծրագրերը, որ Գյուրջինյանն առաջարկել է բուհի զարգացման համար:
Դավիթ Գյուրջինյանը հարգված անձնավորություն է, հիանալի մասնագետ, բազմաթիվ գրքերի և աշխատությունների հեղինակ, երկար տարիներ ղեկավարում է Լեզվի պետական կոմիտեն, հասարակությունն իրեն ընդունում էր, որպես մտավորական, որը պետք է գործեր ի օգուտ սեփական երկրի: Հիմա նա փաստացի մասնակից է դառնում կազմաքանդման պրոցեսի և անում է քայլեր, որը ոչ թե հարիր չէ մտավորականին, այլ հենց իրեն և իր կենսագրությանը:
Բուհը փաստացի քանդում են, լուծարում են՝ անունը դնելով օպտիմալացում: Սա Գյուրջինյանը չտեսնել կամ չգիտակցել չի կարող, գոնե ինքն իր համար սա հասկանում է և կարելի է բացառել, որ անում է քայլեր չգիտակցելով կամ ռեալ չգնահատելով իրավիճակը: Ինչպես կարելի է մի քանի հարյուր հազար դրամը փոխարինել սեփական արժանապատվության, անաչառ մտավորական մնալու, ոլորտում դիրք ու հեղինակություն ունենալու հետ:
Իրապես անհասկանալի է: Պարո՛ն Գյուրջինյան, ինչպե՞ս և ինչո՞ւ գնալ մի տեղ, որտեղ անցակալի հյուր եք, անկախ նրանից թե ով է ուղորդում և հորդորում երբեք պարտված չհամարել Ձեզ: Ամենայն անկեղծությամբ՝ ի՞նչը Ձեզ չէր հերիքում, բավարարում Լեզվի պետական կոմիտեի նախագահի պաշտոնում, ի՞նչը դրդեց միանալ մի թիմը, որը կործանման ճանապարհով է տանում ամբողջ երկիրը:
