«Արցախն առանց արցախցիների» ծրագիրը իրականացնում են քայլ առ քայլ
ՎԵՐԼՈՒԾՈՒԹՅՈՒՆՆԵՐ
Ադրբեջանի իշխանությունները՝ փաշինյանական վարչախմբի աջակցությամբ, քայլ առ քայլ իրականացնում են «Արցախն առանց արցախցիների» հրեշավոր ծրագիրը։
Ադրբեջանի նախագահ Իլհամ Ալիևը Բեռլինում հայտարարել է, թե իրենց համար կարևոր խնդիր է Լաչինի միջանցքի սկզբնամասում անցակետի տեղակայումը։ Լաչինի միջանցքի շրջափակումից հետո սա Ադրբեջանի ամենաառանցքային պահանջն է, որին, ըստ երևույթին, նրանք հասնելու են հենց Նիկոլ Փաշինյանի շնորհիվ։
Խիստ հավաստի տեղեկությունների, անցակետի տեղակայումն արդեն գրեթե համաձայնեցված է, մնացել են մի քանի տեխնիկական խնդիրներ, ընդ որում՝ Ադրբեջանը շտապում է մեկ ամսում իրականացնել այդ հրեշավոր քայլը։ Եթե Հայաստանի գործող իշխանությունները դժգոհություններ չունեն այս հարցում, ռուսական կողմը կտրականապես դեմ է, որ անցակետի մոտ անմիջականորեն ադրբեջանցի սահմանապահներ տեղակայվեն։
Ռուս խաղաղապահները պահանջել են, որպեսզի ադրբեջանցիները հեռավար կազմակերպեն անցակետի ստուգումը, իսկ տեխնիկական միջոցները ներառեն տեսագրման և ռենտգենի սարքեր, որոնց արձանագրածը դիտելու համար ադրբեջանցիների անմիջական շփում Լաչինի միջանցքով երթևեկողների հետ չի լինի։ ռուսական կողմն այդ հարցով բանակցություններ է վարում բացառապես ադրբեջանցիների հետ՝ գիտակցելով, որ այս և այլ հարցերում մոդերատորն Ադրբեջանն է, իսկ Հայաստանի իշխանությունները թուլակամի պես ենթարկվում են բոլոր պահանջներին։
Ադրբեջանն այս ընթացքում չափազանց պրագմատիկ քայլերի է դիմում։ Փաթեթով խաղաղության պայմանագիր ստորագրելու փոխարեն դրվագ առ դրվագ առաջ է մղում յուր պահանջները։ Այս պահի գերխնդիրը Բաքվի համար հենց անցակետ տեղադրելն ու երթևեկությունը լիակատար վերահսկելն է։ Այդ քայլը արցախցիների զգալի մասի արտագաղթի կհանգեցնի, հսկայական հոգեբանական ազդեցություն կունենա արցախցիների վրա։
Մոնիկա Ավագյան
