Նախկին առևտրական Աղազարյանը որոշել է վերացնել փողոցային առևտուրը
ՎԵՐԼՈՒԾՈՒԹՅՈՒՆՆԵՐ
Իշխող «Քաղաքացիական պայմանագիր» խմբակցությունը տգետների և ապիկարների մի փունջ է, որը նաև սեփական «ծաղիկներն» ունի։
Պատգամավոր Հովիկ Աղազարյանը հայ հանրությանը վաղուց հայտնի է իր անհեթեթ մտքերով և պարբերաբար տարբեր սկանդալային իրավիճակներում հայտնվելու ունակությամբ։ Օրեր առաջ էլ Աղազարյանը Տիգրանյան փողոցում կռիվ էր արել փողոցային առևտրականների հետ, քաշքշել և ոտքով հարվածել էր կարտոֆիլ վաճառողների ապրանքին, պահանջել հեռացնել այդ տաղավարները, իբր դրանք վտանգում են փողոցային երթևեկությունը։
Քաշքշուկից հետո Աղազարյանին և վաճառողին կանչել էին ոստիկանություն։ Հովիկ Աղազարյանը տուժող էր ճանաչվել, իսկ առևտրականին ձերբակալել, ապա ազատ էին արձակել։ Այս միջադեպից հետո Աղազարյանը հանդարտվելու և իր արարքի համար ներողություն խնդրելու փոխարեն ավելի է բարբոքվել և այժմ էլ մտադիր է փողոցային առևտրի դեմ պայքարը մինչև վերջ հասցնել։
Լրատվամիջոցների տեղեկություններով՝ նա գրություն է ուղարկել քաղաքապետին՝ պահանջելով տրամադրել հիշյալ փողոցում տեղադրված երկաթյա տաղավարների օրինականության հիմքերը, որից պարզ կդառնա տաղավարը, որտեղ կարտոֆիլ վաճառող քաղաքացին իր ավտոմեքենան կանգնեցրել էր, օրինական հիմքո՞վ է տեղադրվել փողոցի վրա, թե՞ ոչ։
Ինքը՝ Աղազարյանը, տեղեկությունը հաստատել է՝ նշելով, որ դեռևս պատասխան չի ստացել։ Նա կարծում է, որ եթե անգամ հիմքերն օրինական են, ապա վարչական շրջանի ղեկավարությունը դա կարող է ճանաչել գերակա շահ և, փոխհատուցելով սեփականատիրոջը, ապամոնտաժել հանրության առողջությանը վտանգ ներկայացնող տաղավարները։
Ըստ Աղազարյանի՝ փողոցում առևտուրը վթարային իրավիճակ է ստեղծում։ Վթարայինը չգիտենք, սակայն իրավիճակն այդքան ծիծաղելի չէր լինի, եթե ինքը՝ Աղազարյանը, առևտրականի անցյալ չունենար։ Նախորդ կյանքում, երբ դեռ Աղազարյանը պատգամավոր չէր դարձել, այսպես կոչված. հեղափոխության շնորհիվ, նաև հեռացվել էր ՀՅԴ-ից , Նոր Նորք համայնքում փոքր խանութ ուներ, անձամբ էր առևտուր անում, իսկ այժմ հարց է դնում փողոցային առևտուրը վերացնելու վերաբերյալ։
Աղազարյանին և նրա կուսակիցներին, թերևս չի հուզում, որ փողոցային առևտրով հազարավոր մարդիկ են ապրում, իրենց օրվա հացը վաստակում։ Նա այլևս գործող իշխանության կարկառուն կադր է և հարստանալուց հետո կարողանում է իրեն թույլ տալ փողոցային առևտրականների հետ խոսել լկտի ոճով, աքացիներ տալ մարդկանց ստեղծած բարիքին։ Ի դեպ, 90-ականներին Հովիկ Աղազարյանը նաև պատգամավոր է եղել ՀՅԴ-ից և հեռացել էր կուսակցությունից՝ նեղանալով, որ իրեն փող չեն տալիս։
Հարութ Գալստյան
