Ամերիկյան բանկի սնանկացումը զգալի վնաս կհասցնի Հայաստանի IT ոլորտին

Միացյալ նահանգներում խոշորագույն բանկերից մեկի սնանկացումը կարող է շղթայական ազդեցություն ունենալ աշխարհի տարբեր երկրների, այդ թվում նաև Հայաստանի Հանրապետության համար։

Նախօրեին փակվել է Silicon Valley bank-ը, որը 2008 թվականի ֆինանսական ճգնաժամից հետո ԱՄՆ-ում փակված ամենամեծ բանկն է, այն ժամանակ, ի դեպ, փակված «Washington Mutual» բանկն առաջացրեց համաշխարհային ճգնաժամը։ Անցած տարվա վերջի դրությամբ Silicon Valley բանկը ԱՄՆ-ի 16-րդ բանկն էր իր չափով, իսկ անցած շաբաթվա սկզբին ճանաչվել էր ԱՄՆ լավագույն բանկերից մեկը։

2022 թվականի դեկտեմբերի 31-ի դրությամբ «SVB»-ն ուներ 209 միլիարդ դոլարի ակտիվներ և 175,4 միլիարդ դոլարի ավանդներ, ասվում է Կալիֆորնիայի կարգավորիչ մարմնի հաղորդագրության մեջ։ Իրավիճակն այնքան լուրջ է, որ նախագահ Ջո Բայդենը նախօրեին հեռախոսազրույց է ունեցել Կալիֆորնիայի նահանգապետ Գեյվին Նյուսոնի հետ, քնարկել են ցանկացած բանկի շուրջ ստեղծված իրավիճակի կարգավորման ուղիները դաշնային օգնության և կարգավորիչ մարմինների աշխատանքի ասպեկտները։

Բանկի սնանկացումը կործանարար ազդեցություն է ունեցել տեխնոլոգիական ոլորտի վրա և շատ սթարթափեր փորձում են նվազագույնի հասցնել կատարվածի հետևանքները։ «SVB»-ն ոչ միայն կանխիկ գումար էր ընդունում ստարտափերից, այլև առաջարկում էր նրանց վենչուրային և այլ փոխառություններ, ինչպես նաև տրամադրում էր բանկային և վարկային ծառայություններ վենչուրային ընկերություններին։

Ըստ մասնագետների՝ բանկի սնանկացումը իրարանցում է առաջացրել Սիլիկոնյան հովտում, խնդիրներ են առաջանում նաև աշխարհի տարբեր երկրներում, որտեղ կան ամերիկյան ընկերությունների մասնաճյուղեր կամ կոնկրետ հենց այդ բանկի հետ համագործակցող սթարթափեր։ Հայաստանում ևս բազմաթիվ սթարթափեր կանգնած են փակվելու վտանգի առջև։ Հայկական ՏՏ ոլորտը լրջորեն կախված է ԱՄՆ-ից և բազմաթիվ ընկերությունների ներկայացուցիչներ փաստում են, որ այժմ արդեն իրենք էլ են ստիպված լինելու ծախսերի կրճատումներ անելու կամ էլ խնդիրներ են ունենալու ԱՄՆ-ից գումար փոխանցելու հարցում։

ՏՏ ոլորտի մեր զրուցակիցը, որը չցանկացավ բացահայտել իր անունը, նշեց, որ կարող են ֆինանսավորման խնդիրներ ծագել։ ԱՄՆ-ից գումարների փոխանցումը, ըստ ամենայնի կնվազի, ինչպես նաև կնվազեն նոր սթարթափերի ֆինանսավորումները։ Թե որքան կտևի այս իրավիճակը, բարդ է ասել, սակայն փաստ է, որ ԱՄՆ-ում մեկ բանկի շուրջ ծագած իրավիճակը կարող է համաշխարհային ճգնաժամ հարուցել առնվազն ՏՏ ոլորտում։ 

Սոնա Մուրադյան