Հայաստանում բացվել է ռուս ձեռներեցների բիզնես ակումբ
ՎԵՐԼՈՒԾՈՒԹՅՈՒՆՆԵՐ
Economy.gov.ru–ն գրում է, որ Հայաստանում Ռուսաստանի առևտրային ներկայացուցչությունում կայացել է ռուս ձեռներեցների «Հերմես» բիզնես ակումբի առաջին հանդիպումը։ Ռուսաստանի տնտեսական զարգացման նախարարությունից միջոցառմանը մասնակցել է փոխնախարար Դմիտրի Վոլվաչը։
Ողջույնի խոսքում փոխնախարարը նշել է ռուս-հայկական առևտրատնտեսական հարաբերությունների զարգացման բարձր դինամիկան և դրանց ռազմավարական բնույթը։
«Ռուսաստանը մնում է Հայաստանի առաջատար արտաքին առևտրային գործընկերը։ Արդյունաբերական երկխոսությունը զարգանում է մետալուրգիայի, դեղագործության, ավտոմոբիլային, գյուղատնտեսական ճարտարագիտության և թվային տեխնոլոգիաների ոլորտներում: Համատեղ ծրագրեր են իրականացվում տրանսպորտի եւ ուղևորափոխադրումների ոլորտում»,- ընդգծել է Դմիտրի Վոլվաչը։
Նա նաև կարևորել է երկու երկրների պետական կառույցների և գործարար համայնքների միջև ուղիղ կապի ձևավորումը և պատրաստակամություն հայտնել ձեռնարկատերերին ցուցաբերել անհրաժեշտ աջակցություն։
«Ակումբը ստեղծվել է ռուսական և հայկական ընկերությունների շահերը պաշտպանելու, մարդասիրական և բարեգործական ծրագրեր իրականացնելու, ինչպես նաև Ռուսաստանի և Հայաստանի ժողովուրդների միջև բարեկամական հարաբերություններն ամրապնդելու համար։ Հուսով ենք, որ մոտ ապագայում ձեռներեցները կկարողանան լիովին զգալ բիզնես ակումբին անդամակցելու գործնական առավելությունները»,- եզրափակել է Դմիտրի Վոլվաչը։
Ներկայումս «Հերմես» ակումբի անդամների թվում կա մոտ 35 ռուսական խոշոր ձեռնարկություն։
Նյութը հրապարակման պատրաստեց Կամո Խաչիկյանը
