Ինտենսիվ հակաքարոզչություն ռուս խաղաղապահների դեմ. Ո՞ւմ է ձեռնտու
ՎԵՐԼՈՒԾՈՒԹՅՈՒՆՆԵՐ
Արցախում ստեղծված ծանր իրավիճակի պայմաններում նույնիսկ Հայաստանի և Արցախի գործող իշխանությունները շարունակում են հակառուսական քարոզչություն իրականացնել և աջակցել ռուս խաղաղապահների դեմ գործողություններին։
Երեկ մի խումբ արցախցիներ բողոքի ակցիա են իրականացրել Ստեփանակերտի օդանավակայանի մոտ, որտեղ տեղակայված է խաղաղապահների կենտրոնակայանը, ընդ որում բողոքի ակցիաներն ուղեկցվել են միջադեպերով։
Մի քանի երիտասարդներ իրենց մեքենաներով փակել են զորակազմի ռազմակայանի մուտքը, ինչից հետո թեթև քաշքշուկ է եղել խաղաղապահների և ցուցարարների միջև։ Նախապես պատրաստված պաստառներով կենտրոնակայանի մոտ ժամանած ցուցարարները ռուս խաղաղապահներին մեղադրել են իրենց պարտականությունները չկատարելու և արցախցիներին չպաշտպանելու մեջ։
Իհարկե ռուս խաղաղապահների նկատմամբ քննադատությունը ունի որոշակի օբյեկտիվ հիմքեր և անհնար է արդարացնել նրանց անգործությունը, սակայն նույնիսկ ստեղծված պայմաններում բոլոր սլաքները ռուս խաղաղապահ զորախմբի կողմը ուղղելը հղի է լրջագույն վտանգներով թե՛ Արցախի համար և թե՛ Հայաստանի, մինչդեռ գործող վարչախումբը, տուրք տալով իր արտաքին քաղաքական վեկտորը փոխելու գործողություններին, ամեն ինչ անում են ռուս խաղաղապահների դեմ բողոքի լայն արշավ սկսելու համար։
Ռուսաստանցի քաղաքագետ Ալեքսանդր Մարկեդոնովը երեկ հայտարարել է, թե Արցախից ռուս խաղաղապահների դուրս բերումը կարող է հանգեցնել նաև Հայաստանի տարածքից 102-րդ ռուսական ռազմակայանը ընդհանրապես դուրս բերելուն։
Խաղաղպահների դեմ գործողությունների անթույլատրելիության մասին է խոսել նաև Հայաստանի երրորդ նախագահ Սերժ Սարգսյանը՝ իր գրքի շնորհանդեսի ժամանակ։ Նա նշել է, որ Հայաստանն այս պահին այլ դաշնակիցներ չունի և ռուս խաղաղապահներին այլ խաղաղապահ ուժերով փոխելն անհնար է։
Թերևս այս հանգամանքը քիչ է հետաքրքրում Նիկոլ Փաշինյանին և Արայիկ Հարությունյանին, որոնք ամեն գնով ցանկանում են տարածաշրջանից հեռացնել Ռուսաստանին և նրանց փոխարինել թուրք-ադրբեջանական տանդեմով։ Ռուս խաղաղապահների դեմ այս արշավը բխումէ Բաքվի սրտից, և Հայաստանի ու Արցախի իշխանությունների շահեր համադրվում են Ադրբեջանի շահերի հետ։
Լինա Արամյան
