Ադրբեջանը նոր սադրանքներ է անում ու նոր պահանջներ դնում

Արդարադատության միջազգային դատարանի վճռից հետո Ադրբեջանն անցել է սադրանքների և ագրեսիայի նոր փուլի։

Երեկ, ադրբեջանական զինուժը դիվերսիոն ներթափանցում է իրականացրել Ստեփանակերտի Կրկժան թաղամասից դեպի Լիսագոր գյուղ ընկած հատվածում՝ Խափարլու կոչվող տարածքում, թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։

Ադրբեջանական սադրանքի հետևանքով զոհվել են փոխգնդապետ Արմեն Բաբայանը, մայոր Դավիթ Դանիելյանը, լեյտենանտ Արարատ Գասպարյանը, ևս մեկ ծառայող ՝ լեյտենանտ Դավիթ Հովսեփյանը, ստացել է կրծքավանդակի հրազենային վիրավորում և գտնվում է Հանրապետական բժշկական կենտրոնում։ Հայաստանի ԱԳՆ-ն և Արցախի իշխանությունները դատապարտել են Ադրբեջանի այս վարքը, նշել, որ Ադրբեջանը սրանով փորձում է լայնածավալ էսկալացիայի նոր հիմքեր ստեղծել։

Իսկ Ադրբեջանը, թերևս օգտվելով այլևս պետնախարարի պաշտոնից Ռուբեն Վարդանյանին ազատելու իր պահանջը կատարելու հետ, նոր պահանջներ է ներկայացնում հայկական կողմին։ «Ադրբեջանի ԱԳՆ-ն պահանջել է անհապաղ դուրս բերել բոլոր հայկական զինված ուժերն Արցախից։ Նման ագրեսիան և սադրանքները ցույց են տալիս, որ Հայաստանը չի հրաժարվել Ադրբեջանի նկատմամբ իր օկուպացիոն քաղաքականությունից, որ խաղաղության օրակարգի վերաբերյալ Հայաստանի տեսակետներըը ոչ այլ ինչ են, քան կեղծավորություն»,- ասված է Ադրբեջանի ԱԳՆ հաղորդագրության մեջ։

Բաքուն նաև պահանջել է Ադրբեջանի և Հայաստանի միջև սահմանային հսկողության ռեժիմի կիրառում իրականացնել, այն ինչը տևական ժամանակ հենց Ադրբեջանի իրական ցանկությունն էր՝ վերահսկել Արցախ գնացող բոլոր բեռները և մարդկանց։ Ադրբեջանական այս հերթական սադրանքը վկայում է, որ նույնիսկ Հայաստանի իշխանությունների քարոզած Ստեփանակերտի և Բաքվի միջև ուղիղ բանակցությունները չեն նպաստում արցախցիների անվտանգությանը և իրավունքների ապահովմանը, և առիթ են Ադրբեջանի կողմից ուժային ճնշում կիրառելու համար, գործընթացում լիակատար հնազանդության հասնելու նպատակով։

Քաղաքագետները նշում են, որ միայն միջազգային կառույցների հսկողության տակ ընթացող թափանցիկ բանակցությունները կարող են հուսադրող հեռանկարներ ենթադրել։ Այս իրավիճակում չափազանց տարօրինակ է նաև ռուս խաղաղապահների գործողությունները, նրանք ոչ միջամտել են, ոչ էլ որևէ կերպ կանխել ադրբեջանցիների այս գործողությունները, ինչը վկայում է, որ Մոսկվան ևս չափազանց դժգոհ է Հայաստանի իշխանությունների վարքից և իր կողմից սեփական պատժիչ գործողություններն է իրականացնում։

Միլենա Մարգարյան