Հերքումների շարան Ադրբեջանի և Արցախի ներկայացուցիչների հանդիպումից հետո

Արցախի պետնախարար Ռուբեն Վարդանյանի պաշտոնանկությունից օրեր անց և Բաքվում Սերգեյ Լավրովի հանդիպումներից մեկ օր հետո, երեկ Խոջալուում՝ ռուսական խաղաղապահ զորակազմի շտաբում, տեղի է ունեցել Արցախի և Ադրբեջանի ներկայացուցիչների հերթական հանդիպումը, ընդ որում կողմերից յուրաքանչյուրը հանդիպման օրակարգն ու քննարկման հարցերը յուրովի են մեկնաբանել։

Արցախի նախագահականի փոխանցմամբ՝ ռուս խաղաղապահների միջնորդությամբ տեղի ունեցած հանդիպմանը քննարկվել է Լաչինի միջանցքով մեքենաների անխոչընդոտ անցումը վերականգնելու և միջանցքի նպատակային օգտագործման փաստը հաստատելու հարցը։ Կողմերը քննարկել են նաև էլեկտրաէներգիայի և գազի անխափան մատակարարման հարցերը, Դրմբոնի և Կաշենի հանքավայրերում Ադրբեջանի ներկայացուցիչների կողմից շրջակա միջավայրի մոնիթորինգի հնարավորությունը։

Պայմանավորվածություններ են ձեռք բերվել հետագա համագործակցության վերաբերյալ, լարվածության նվազեցման և տարածաշրջանում խաղաղ կյանքի հաստատման ուղղությամբ։ Բաքուն արմատապես այլ պայմաններ է ներկայացրել, որոնք իբր քննարկվել են, նշվում է, թե քննարկվել է Ադրբեջանի Ղարաբաղի շրջանում ապրող հայերին Ադրբեջանում ինտեգրելու հարցը՝ երկրի սահմանադրությանն ու օրենքներին համապատասխան։ Կողմերը նաև ներկայացուցիչներ են նշանակել հանդիպումների համար։ Ադրբեջանական պատվիրակությունը երեկ ղեկավարել է Միլլի Մեջլիսի պատգամավոր Ռամին Մահմեդովը, որին ներկայացնում են որպես Ղարաբաղում ապրող հայերի հետ շփումների պատասխանատու։

44-ամյա Մահմեդովը ծնվել է Արցախի Մարտակերտ քաղաքում, դպրոց հաճախել Շուշիում, 2020 թվականից Միլլի Մեջլիսի պատգամավոր է։ Արցախից հանդիպմանը մասնակցել է անվտանգության խորհրդի քարտուղար Սամվել Շահրամանյանը։ Ռուս խաղաղապահները այլ մանրամասներ չեն հայտնում։

Արցախի ԱԳՆ-ն է տեղեկություն տարածել Արցախի և Ադրբեջանի ներկայացուցիչների վերաբերյալ, նշել, թե Արցախի հանրապետության քաղաքական իրավիճակին վերաբերվող հարցեր հանդիպման մասնակիցները չեն քննարկել, իսկ հանդիպման արդյունքներով ադրբեջանական կողմի արած մեկնաբանությունները իրականությանը չեն համապատասխանում։ «Արցախի Հանրապետությունը պահպանում է հանձնառությունը իր ժողովրդի ինքնորոշման և անկախության ուղու ընտրությանը, որն ամրագրվել է 1991 թվականի հանրաքվեի ժամանակ», - նշում են Արցախի ԱԳՆ-ից։

Այդուհանդերձ, արդեն իսկ հանդիպումը և քննարկած հարցերի շրջանակը վկայում են, որ Ադրբեջանը Ռուբեն Վարդանյանի պաշտոնազրկմամբ հասել է իր հիմնական նպատակներից մեկին և շարունակում է նորանոր պահանջներ ներկայացնել հայկական կողմին։

Լինա Ստեփանյան