Հայաստանը դեռ երկար կմնա առանց ՄԻՊ-ի

Հայաստանի գործող իշխանություններն այդպես էլ չեն կարողանում Մարդու իրավունքների պաշտպանի թեկնածու գտնել։ «Քաղաքացիական պայմանագիրը» իրենց առաջարկած մի քանի թեկնածուներին նույնիսկ չի կարողանում համոզել ստանձնել օմբուսդմենի պաշտոնը։ ԱԺ կանոնակարգի համաձայն՝ պաշտոնը թափուր մնալուց հետո եռամսյա ժամկետում նոր ՄԻՊ պետք է ընտրվի։ Շուտով արդեն կլրանա 1 ամիսը, ինչ Հայաստանը Մարդու իրավունքների պաշտպան չունի։

Ընդդիմությունը կտրականապես հրաժարվել է որևէ թեկնածու ներկայացնել՝ հասկանալով, որ իրենց առաջադրած թեկնածուները որևէ շանս չունեն ընտրվել այդ պաշտոնում, իսկ ամբիոնը քաղաքական նպատակներով օգտագործելու դեպքում կարող են լրջագույն խնդիրների բախվել՝ ընդհուպ մինչև իշխանության հետ նոր ծեծկռտուքներ։ Իշխանությունն ինքն էլ չի կարողանում իրեն առնվազն դրական կամ չեզոք տրամադրված իրավապաշտպաններից որևէ մեկին առաջադրել օմբուսդմենի պաշտոնում։

Մեր տեղեկություններով՝ այս օրերին քննարկվում է ՔՊ կազմից թեկնածու առաջադրելու հարցը, եթե որևէ մեկին առաջադրեն, ապա նա ստիպված կլինի նախ դնել մանդատը, ապա և դուրս գալ կուսակցություններից։

ՔՊ մեր աղբյուրի փոխանցմամբ՝ ներկայումս քննարկվում է 2 անուններ «Քաղպայմանագրի» ցանկից՝ Հերիքնազ Տիգրանյանի և Արուսյակ Ջուլհակյանի թեկնածությունները։ Վերջիններս բնավ էլ դեմ չեն զբաղեցնել կարևորագույն այդ պաշտոնը, մինչդեռ Փաշինյանը նրանց և իր կուսակիցներին հորդորել է սպասել որոշ ժամանակ մինչև հնարավոր լինի մեկ այլ ավելի քիչ վարկաբեկված թեկնածուի առաջադրել, կամ էլ անցկացնել ՄԻՊ պաշտոնում։

«Քաղպայմանագրում» ևս հակված են դրսից առաջադրվող թեկնածությանը և չեն ցանկանում Տիգրանյանին կամ Ջուլհակյանին գործուղել ՄԻՊ գրասենյակ՝ հստակ հասկանալով, որ այդ երկուսը, ի տարբերություն ՔՊ մյուս անդամների, գոնե պատկերացնում են, թե ինչ է պատգամավորական աշախատանքը և որոշակի կրթական ցենզ ունեն, իսկ նրանց մանդատը դնելու դեպքում Ազգային ժողովում կարող է հայտնվել հերթական անգրագետը, որը նույնիսկ մեկ միտք չի կարողանա իրար կապել, ուստի և առնվազն ևս մեկ ամիս, Հայաստանը կմնա առանց մարդու իրավունքների պաշտպանի։

Նարե Ադամյան