Հայ-ռուսական հարաբերությունները վատթարանում են երկրաչափական պրոգրեսիայով

Հայաստանում Եվրամիության դիտորդների տեղակայումից հետո, ինչպես և սպասելի էր, հայ-ռուսական հարաբերությունները վատթարանում են երկրաչափական պրոգրեսիայով։

Բնականաբար, ռուսական կողմը չափազանց ցավոտ է ընդունում Հայաստանում Եվրամիության դիտորդների տեղակայման հանգամանքը, իսկ Հայաստանի իշխանություններն օգտվելով իրենց եվրոպացի գործընկերների քաջալերումից և գործող ընդդիմության բավականին թույլ լինելու համգամանքից, ամեն ինչ փորձում են անել Ռուսաստանի հետ հարաբերությունները սրելու համար։ 

Անվտանգության խորհրդի քարտուղար Արմեն Գրիգորյանը երեկ հարցազրույց է տվել սորոսական հայտնի կայքերից մեկին և ընդհուպ մի քանի հայտարարություններ արել, որոնք չեն բխում բացարձակապես հայ-ռուսական ռազմավարական դաշնակցության հիմքերից։

Գրիգորյանը նախ հայտարարել է, թե Հայաստանը բացարձակապես մտադիր չէ բանակցել Ադրբեջանի կամ Ռուսաստանի հետ՝ Լաչինի միջանցքի հարցով։ Հիշատակելով եռակողմ հայտարարությունը՝ ըստ որի Ադրբեջանը պետք է ապահովի բեռների և մարդկանց ազատ տեղաշարժը, իսկ վերահսկողությունը պետք է իրականացնեն ռուս խաղաղապահները։

Գրիգորյանը նաև հայտարարել է, թե ի տարբերություն Եվրամիության, ՀԱՊԿ-ը չի ճանաչում Հայաստանի սահմանները և սա լուրջ խնդիր է, որը պետք է լուծում գտնի։ Չի շրջանցվել նաև գազի հարցը։ Խոսելով Ռուսաստանի կողմից Հայաստանին մատակարարվող գազի հնարավոր խափանումների մասին՝ Արմեն Գրիգորյանը բառացի սպառնացել է, թե Հայաստանը գազի խնդիրներ եթե ունենա, կգտնի գործող համակարգերի այլընտրանքային լուծումներ։ 

Հիշեցնենք, որ Հայաստան գազամատակարարման ամբողջ համակարգը ռուսական գազպրոմի սեփականությունն է, և Ռուսաստանն է գազի ոլորտում քաղաքականություն մշակողը և իրականացնողը, ուստի և Հայաստանի գործող վարչախմբի ներկայացուցչի այս հայտարարությունը հստակ սպառնալիք է ռուսական ոչ միայն քաղաքական, այլ նաև տնտեսական շահերին։

Միակ տեղը, որտեղից Հայաստանը կարող է գազ ստանալ դա Իրանն է, թեև այդ ենթակառուցվածքները ևս պատկանում են Ռուսաստանին։ Իհարկե, գործող իշխանությունները մի քանի անգամ տարբեր առիթներով տեղեկություններ են տարածել, թե կարող են ազգայնացնել Գազպրոմի սեփականությունը կամ պետականացնել «Գազպրոմ Արմենիա» ընկերությունը, մյուս կողմից չի բացառվում, որ Նիկոլ Փաշինյանի վարչախմբից սպասելի է, որ պայմանավորվածությունների հանգեն Ադրբեջանի հետ՝ ռուսական ազդեցությունը թուլացնելու նպատակով գազ սկսեն ստանալ հենց Ադրբեջանից։

Ալիսա Ավագյան