Խաչատուրովների ընտանիքին ի՞նչ չի ներվում

ՀՀ հակակոռուպցիոն դատարանն երեկ՝ փետրվարի 21-ին, մերժել է 3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովին կալանավորելու մասին քննիչի միջնորդությունը: Խաչատուրովը մեղադրվում է փողերի լվացման մեջ: Ըստ իրավապահների՝ 2006-ից 2010 թվականներին զբաղեցնելով զորամասի հրամանատարի պաշտոնը, հանցավոր ճանապարհով ձեռք է բերել անշարժ գույք, ապա օրինականացրել այն։ Խոսքը Արարատի մարզի Արմաշ գյուղում տեղակայված զորամասի տարածքի մասին է: Գեներալի մեղադրանքն առնչվում է Պաշտպանության նախկին նախարար, Հայաստան խմբակցության ղեկավար Սեյրան Օհանյանի գործին:

Ըստ քրեական գործի՝ պաշտպանության նախարար եղած ժամանակ Սեյրան Օհանյանը Արարատի մարզում գտնվող նշված երկու զորամասերի տարածքները, որոնք հանդիսացել են պաշտպանության նախարարության սեփականությունը, օտարել և անհամեմատ էժան գնով վաճառել է։ Ազգային ժողովում գլխավոր դատախազը հայտարարել էր, որ Գրիգորի Խաչատուրովը հանդիսանալով մեկ այլ զորամասի հրամանատար,  դրանցից մեկը գրավադրել է բանկում և գումար ստացել։ Այսօր էլ պարզ դարձավ, որ գնել է 4մլն դրամով և գրավադրել է 18մլն դրամով: Խաչատուրովի պաշտպան Հակոբ Ենոքյանը ասում է, որ գրավի առարկան տվյալ տարածքը չի եղել, այլ ուղղակի մաս է կազմել: 

Նկատենք, որ խոսքը 12 տարի առաջ տեղի ունեցած իրադարձության մասին է: Բանն այն է, որ Խաչատուրովների ընտանիքն իշխանության համար այնքան էլ հաճելի չէ: Յուրի Խաչատուրովին մեղադրանք առաջադրվեց դեռ այն ժամանակ, երբ ՀԱՊԿ գլխավոր քարտուղարն էր: Իգոր Խաչատուրովին բազմիցս հակաիշխանական ցույցերին մասնակցելու համար բերման են ենթարկել,  նրան ևս մեղադրանք է առաջադրված:

Քննչական կոմիտեն նույնիսկ  նրա մեղադրանքը ձևակերպելիս նշել էր, որ հնարավոր է թմրանյութի ազդեցության տակ լինի՝ չունենալով բժշկական հետազոտության ստույգ տվյալներ: Գրիգորի Խաչատուրովին չի ներվում, այն, որ նա ստորագրել էր ԳՇ-ի  Փաշինյանի հրաժարականը պահանջող տեքստի տակ: Մի քանի անգամ էլ վերահաստատել է իր տեսակետը: Բացի այդ 3-րդ բանակային կորպուսի նախկին հրամանատարը հեղինակություն է բանակում և հիմա էլ շարունակում է մեծ հարգանք վայելել սպայական անձնակազմում: Խաչատուրովը բազմիցս աչքի է ընկել մարտական բարձր որակի ծառայությամբ և շքանշան ստացել նույնիսկ Նիկոլ Փաշինյանից:

Այս քրեական վարույթում մեղադրանք է առաջադրված անձնանց, ովքեր բանակում հեղինակություն ունեն և կարող են նաև լուրջ ազդեցություն ունենալ: Իհարկե այս անձինք կանգնած են նաև իշխանության կոկորդին, բայց սա բանակի հեղինակության խնդիրն է: Սա ևս այն լավագույն օրինակներից է, որ իշխանությունն է որդեգրել իրավապահ համակարգի նկատմամբ՝ պատժել քրեական վարույթներով, իսկ ձերբակալումն ու կալանքը խափանման միջոց կիրառել, որպես պատիժ: 

Այսպես արժեզրկում են բանակը և միաժամանկ վրեժ լուծում ըմբոստներից: Բանակից գողություն անող սպային չեն հարգում, ընդունում են, որպես դավաճան: Եվ հենց վերջին պիտակն անձի վրայից վերցնելու համար էլ այն փաթաթել և դեռ շարունակելու են փաթաթել շատերին: Ժողովրդական մի ասացվածք կա՝ երբ ցեխ ես շպրտում ուրիշի վրա այն կարող է նրան չհասնել, բայց ձեռքերդ հաստատ ցեխոտվում են: 

Աննա Ավետիսյան