Վարչախումբը ձախողում է ցանկացած բարեփոխում, որին ձեռք է գցում
ՎԵՐԼՈՒԾՈՒԹՅՈՒՆՆԵՐ
Պարեկային ծառայության ղեկավարի պաշոնից նախօրեին ազատվել է գնդապետ Արթուր Ումրշատյանը։ Ոստիկանությունից ազատման պատճառը չեն մանրամասնում, թեև տեղեկություններ են շրջանառվում, որ Ումրշատյանի ազատումը կապված է օրեր առաջ Հանրապետության Հրապարակում տեղի ունեցած միջադեպի հետ, երբ մի խումբ պարեկներ ժամից ավելի չէին կարողանում կանգնեցնել վտանգավոր երթևեկությամբ աչքի ընկնող «Համերի» վարորդին։
Վերջինիս հաջողվել էր նույնիսկ կանգնեցնել մեքենան Ագաթանգեղոսի փողոցում և փախուստի դիմել։ Դրանից հետո Պարեկային ծառայության աշխատակիցները հայտնվել էին սոցցանցերում ծաղրանքի ներքո, շատերը փաստում էին, որ պարեկները աչքի են ընկել կոմպետենտության բացարձակ բացակայությամբ և չեն կարողացել իրականացնել իրենց ծառայության տարրական պահանջները։ Մինչդեռ, Ումրշատյանի ազատումը այդ պաշտոնից մի շարք իրավապաշտպանների համար առիթ է դարձել ոստիկանությանը մեղադրելու բարեփոխումների տապալման մեջ, իսկ պարեկային ծառայության նախկին պետին ներկայացրել էին որպես ոստիկանական բարեփոխումների դրոշակակիր։
Այն, որ Ումրշատյանը վերջին շրջանում բավականին զգալի աշխատանք էր կատարել հերքել բնավ չարժե, սակայն նրան ոստիկանությունում բարեփոխումների դրոշակակիր ներկայացնելու հանգամանքն էլ ֆանտաստիկայի ժանրից է։ Հայաստանի գործող իշխանությունները 2018 թվականի իշխանափոխությունից հետո տապալել են ցանկացած բարեփոխում Հայաստանում, այդ թվում նաև պարեկային ծառայության այդքան թմբկահարված բարեփոխումը։ Բնականաբար, արևմտյան գրանտներով սնվող իրավապաշտպանների համար պարեկային ծառայությունը «սեփական զավակի» պես է, Եվրամիությունը զգալի միջոցներ էր հատկացրել Հայաստանում պարեկային ծառայություն ձևավորելու ուղղությամբ, ուստի և որևէ իրավապաշտպան չի խոստովանի իրենց իսկ նախաձեռնած բարեփոխման ձախողումը։
Խնդիրն այստեղ ամենևին էլ պարեկային ծառայությունը կամ Ումրշատյանը չէ, խնդիրը բացառապես Հայաստանի գործող իշխանությունների անընդունակությունն է, ոչ կոմպետենտությունը՝ հասարակ բարեփոխումներ իրականացնելու, թե՛ դատական ոլորտում, թե տնտեսության մեջ, թե՛ ոստիկանությունում և հատուկ ծառայություններում նախաձեռնված բոլոր բարեփոխումները խայտառակ ձախողում են արձանագրել, իսկ զինված ուժերում Փաշինյանի և նրա վարչախմբի իրականացրած գործողությունները, վաղուց այլևս ծիծաղելի չեն, այլ ավելի շուտ ողբերգական են, քանի որ դրանց հետևանքով, Հայաստանի զինված ուժերը հայտնվել են խայտառակ մի իրավիճակում։
Ըստ էության , գործ ունենք մի իրավիճակի հետ, երբ Հայաստանը ղեկավարում են ապիկար, տգետ և սեփական պարտականություններից գլուխ չհանող մարդկանց մի բազմություն։
Նարինե Վարդանյան
