Փաշինյանի անունը միայն կեսգիշերին են ավելացրել քննարկման մասնակիցների ցանկում
ՎԵՐԼՈՒԾՈՒԹՅՈՒՆՆԵՐ
Գերմանական Մյունխենում երեկ մեկնարկել է ամենամյա անվտանգության միջազգային ֆորումը, որին մասնակցում է նաև Հայաստանի վարչապետը, տասնյակ այլ երկրների ղեկավարներ։
Ի դեպ, գործող իշխանությունները և նրանց սպասարկուները վարչապետի այցը Մյունխեն ներկայացնում են որպես դարակազմիկ մի իրադարձություն, մինչդեռ երեկ մինչև կեսգիշերին Փաշինյանի որևէ մասնակցություն կարևորագույն քննարկումներին հաստատված չէր։
Միջոցառման օրակարգով՝ այսօր նախատեսված է պանելային քննարկում, «Շարժել լեռները. Անվտանգության կառուցում Հարավային Կովկասում» թեմայով։ Ի սկզբանե նախատեսված էր, որ բանախոսներն են լինելու ԵԱՀԿ գլխավոր քարտուղար Հեկգա Մարիա Շմիդտը, Վրաստանի վարչապետ Իրաքլի Ղարիբաշվիլին և Ադրբեջանի նախագահ Իլհամ Ալիևը։ Փաշինյանի անունը միայն կեսգիշերին մոտ է ավելացվել, այն էլ, մեր տեղեկություններով, ԵՄ պնդմամբ։
Հայաստանի վարչապետի աթոռը զբաղեցնող անձը չէր ցանկանում Ալիևի հետ քննարկման մասնակցել, բանավիճել, պատահաբար մեկ-երկու բառ էլ հօգուտ սեփական երկրի ասել, մինչև նրան պարզապես պարտադրել են մասնակցել։ Հայաստանի իշխանությունները նաև համառորեն հերքում են Իլհամ Ալիևի հետ հանդիպման հնարավորությունը, թեև ադրբեջանական լրատվամիջոցները պնդում են, որ այդպիսի հանդիպում նախատեսված է։
Ի վերջո, Հայաստանի կառավարությունը հայտարարեց, որ եթե նման հանդիպում ծրագրվի, իրենք անպայման կտեղեկացնեն։
Կհանդիպի՞, թե՞ ոչ Ադրբեջանի նախագահի հետ Նիկոլ Փաշինյանը, դեռևս վաղ է նշել, փաստն այն է, որ նա հնարավորինս խուսափում է Իլհամ Ալիևի հետ հարաբերվելուց, իսկ Մյունխեն էլ մեծ հավանականությամբ մեկնել է ընդամենը մինչև ամսի 19-ը Հայաստանում չլինելու համար։ Փետրվարի 20-ից արդեն տեղակայվելու են Եվրամիության դիտորդները, որոնց տեղակայման վերաբերյալ իրենց դժգոհությունն են հայտնելու ոչ միայն Ադրբեջանի իշխանությունները, այլ նաև Ռուսաստանը։
Սոնա Գալստյան
