Փաշինյանը որոշել է ատամներով պաշտպանել առողջապահության նախկին ու ներկա նախարարներին
ՎԵՐԼՈՒԾՈՒԹՅՈՒՆՆԵՐ
Հակակոռուպցիոն կոմիտեն մի շարք դեպքերով քննություն է իրականացնում Արսեն Թորոսյանի պաշտոնավարման տարիներին առողջապահության նախարարությունում հայտնաբերված մի շարք չարաշահումների դեպքերի վերաբերյալ։ Այդ քրեական գործերով կարող են լուրջ խնդիրներ ունենալ Արսեն Թորոսյանն ու Անահիտ Ավանեսյանը։
Հիշեցնենք, որ ավելի քան 1 տարի առաջ հաշվեքննիչ պալատը մի շարք չարաշահումներ էր արձանագրել առողջապահության ոլորտում, թե՛ գնումների գործընթացում, թե՛ գործուղումների ու կորոնավիրուսի դեմ պայքարի համար հատկացված գումարների ծախսերում։ Նախարարությունը շատ դեպքերում չէր կատարել կառավարության որոշման պահանջները, գործուղումների ծախսերի հատուցումը կիսատ-պռատ է ներկայացրել, ինչպես նաև բազմաթիվ դրվագներով կեղծ տեղեկություններ է ներկայացրել։
Մեր աղբյուրի փոխանցմամբ՝ հակակոռուպցիոն կոմիտեն այս փուլում գրեթե սառեցրել է գործերի քննությունը, քանի որ Նիկոլ Փաշինյանը որոշել է ատամներով պաշտպանել առողջապահության նախկին ու ներկա նախարարներին։
Փաշինյանը ամեն կերպ պաշտպանում է իր ապիկար պաշտոնյաներին՝ չնայած կորոնավիրուսի դեմ պայքարում թույլ տված խայտառակ սխալներին, որոնք հազարավոր մարդկանց կյանք արժեցան։ Ավելին, Փաշինյանն ինքն ամեն ինչ արել է, որպեսզի Արսեն Թորոսյանը հայտնվի «Քաղաքացիական պայմանագիր» կուսակցության վարչությունում։
ՔՊ մեր աղբյուրի փոխանցմամբ՝ կուսակցությունում, թե՛ Անահիտ Ավանեսյանի և թե՛ Արսեն Թորոսյանի նկատմամբ առանձնակի բացասական վերաբերմունք է ձևավորվել, հատկապես խորհրդարանական խմբակցությունը այս երկու գործիչների հետ էլ լուրջ խնդիրներ ունի և որևէ կերպ չեն կարողանում նրանց հետ աշխատելու ուղիներ գտնել։
Օրեր առաջ էլ նույնիսկ ՔՊ խմբակցության հետ հանդիպմանը, Փաշինյանն առանձնահատուկ զգուշացրել է, որ թե՛ Թորոսյանը և թե՛ Ավանեսյանը վայելում են իր լիակատար աջակցությունն ու վստահությունը և հանձնարարել է նրանց դեմ որևէ քայլեր չկատարել, իսկ հակակոռուպցիոն կոմիտեն առայժմ միայն նյութեր է նախապատրաստում, ամենայն հավանականությամբ, քրեական գործը նույնիսկ դատարան չի հասնի։
Սերինե Բադալյան
