«Քաղաքացիական պայմանագրում» չեն դադարում խմորումները պաշտպանության նախարարի անձի շուրջ

«Քաղաքացիական պայմանագրում» չեն դադարում խմորումները պաշտպանության նախարարի անձի շուրջ։

ՔՊ մեր աղբյուրի փոխանցմամբ՝ Նիկոլ Փաշինյանը որևէ կերպ չի կարողանում նայել Սուրեն Պապիկյանի դիրքերի և ազդեցության աճը, ինչպես նաև «Քաղաքացիական պայմանագրի» վարչության ընտրությունների ժամանակ թույլ տրված կեղծիքները։ Փաշինյանն այդ կեղծիքները դիտարկում է երկու առումով. նախ դրանց շնորհիվ Պապիկյանին հաջողվել է լուրջ ազդեցություն ձեռք բերել ՔՊ-ում և երկրորդ՝ կեղծիքների մասին տեղեկատվության արտահոսքը լրջորեն խաթարել է «Քաղաքացիական պայմանագրրի» հեղինակությունը ոչ միայն Հայաստանում, այլ նաև արտերկրում։ Ուստի և Փաշինյանը փորձում է ազատվել Սուրեն Պապիկյանից՝ նրան «պատվավոր» աքսոր ուղարկել որևէ երկրում՝ որպես դեսպան։ Պապիկյանի դեմ հիմնական գործողությունները, ինչպես նաև ինտրիգները ծրագրում և կազմակերպում է Ազգային ժողովի պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։

Վերջինս լուրջ ախորժակ ունի՝ ինքը պաշտպանության նախարարի պաշտոնը ստանձնելու, սակայն նրան չի հաջողվում այդ հարցով ստանալ Նիկոլ Փաշինյանի հավանությունը։ Քոչարյանը, որ ժամանակին պաշտպանության փոխնախարար է եղել դեռևս Վազգեն Սարգսյանի օրոք, ի տարբերություն ՔՊ այլ ներկայացուցիչների, շատ ավելի լավ է պատկերացնում ոլորտը, իսկ Ազգային ժողովի հանձնաժողովի նախագահ եղած ժամանակ շատ ավելի լավ կապեր ու հմտություններ է ձեռք բերել, ինչն էլ թեև օգտագործում է սեփական անձնական շահերի, այլ ոչ թիմի համար։ Փաշինյանը լրջագույն մտահոգություն ունի, որ Անդրանիկ Քոչարյանին Պապիկյանի տեղը նշանակելով, ունքը դզելու փոխարեն, աչքն էլ կարող է հանել, ուստի և փորձում է քաղաքական նշանակում անել սեփական կուսակիցների ցանկից, բայց մինչ օրս որևէ մեկը չի համաձայնվել այդ լրջագույն պարտականությունը վերցնել իր ուսերին։ Շրջանառվող մի քանի կուսակցականներն էլ գիտակցում են, որ կարող են լուրջ խնդիրների առաջ կանգնել, կամ էլ կոպիտ ասած՝ գցել իրենց ոտքին պաշտպանության նախարարի պաշտոնը։

Վահագն Ամիրաղյան