ՆԱՏՕ-ի գլխավոր քարտուղարը Թուրքիային կոչ է արել աջակցել Շվեդիայի և Ֆինլանդիայի՝ դաշինք մտնելուն
ՄԻՋԱԶԳԱՅԻՆ
ՆԱՏՕ-ի գլխավոր քարտուղար Յենս Ստոլտենբերգը կոչ է արել Թուրքիայի իշխանություններին միաժամանակ ընդունել Շվեդիայի և Ֆինլանդիայի՝ դաշինքին անդամակցելու արձանագրությունները։ Այս մասին հայտնում է РИА Новости-ն։
«Ֆինլանդիան և Շվեդիան դիմել են միասին, Մադրիդում ՆԱՏՕ-ի գագաթնաժողովում որոշվել է այդ երկու երկրներին դաշինք հրավիրել, այնուհետև բոլոր դաշնակիցները ստորագրել են նրանց մուտքի արձանագրությունը»,- բացատրել է Ստոլտենբերգը։
ՆԱՏՕ-ի գլխավոր քարտուղարը հիշեցրել է, որ 28 երկրներ արդեն ստորագրել են համապատասխան արձանագրությունները։
«Թուրքիան պետք է որոշի՝ վավերացնել մեկ փաստաթուղթ, թե երկուսը, ինչպես ես եմ խորհուրդ տալիս»,- եզրափակել է նա։
Ավելի վաղ Ստոլտենբերգը հայտնել էր, որ փետրվարի 16-ին կմեկնի Թուրքիա՝ քննարկելու Ֆինլանդիայի և Շվեդիայի՝ դաշինքին միանալու պայմանները։
Իր հերթին, Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան բացասաբար է վերաբերվում Շվեդիայի՝ ՆԱՏՕ-ին անդամակցելու հնարավորությանը Շվեդիայում Թուրքիայի դեսպանատան դիմաց աջ արմատական ակտիվիստների կողմից Ղուրանն այրելու պատճառով։
Ֆինլանդիան և Շվեդիան ՆԱՏՕ-ին անդամակցելու հայտ են ներկայացրել անցյալ տարվա փետրվարին, և նրանց անդամակցության դիմումները վավերացրել են դաշինքի բոլոր անդամները, բացառությամբ Հունգարիայի և Թուրքիայի:
