Լուկաշենկոն ՀԱՊԿ անդամ երկրներին կոչ է արել հստակեցնել դիրքորոշումն Ուկրանիայի հակամարտության ֆոնին

Բելառուսի նախագահ Ալեքսանդր Լուկաշենկոն Հավաքական անվտանգության պայմանագրի կազմակերպության գլխավոր քարտուղար Իմանղալի Թասմաղամբեթովի հետ հանդիպմանը կոչ է արել ՀԱՊԿ երկրներին միավորվել և հստակեցնել  իրենց քաղաքականությունը ուկրաինական հակամարտության ֆոնին։ Նրա խոսքերը մեջբերել է BelTA գործակալությունը։

«Եթե ինչ-որ մեկը մտածում է, որ Ուկրաինայի և Ռուսաստանի միջև հակամարտությունը մեր հակամարտությունը չէ, որ մենք ինչ-որ տեղ հանգիստ կնստենք, նման բան չի լինի: Ժամանակը կգա, այն հեռու չէ, բառացիորեն վաղը, և այն կպահանջի հստակեցնել, որոշակի դիրքորոշում ընդունել,- երկուշաբթի ասել է Լուկաշենկոն։- Ես դա չեմ ասում ի վնաս ազգային շահերի և այլն, բայց մեր դաշնակցային բոլոր թերություններով հանդերձ՝ մենք պետք է հստակ սահմանենք մեր քաղաքականությունը, մեր գիծը, որպեսզի միասին գործենք։»։ Նրա խոսքով՝ միասին «միշտ էլ ավելի հեշտ է ու թեթև»։

Բելառուսի նախագահն ընդգծել է, որ ՀԱՊԿ-ում պետք է փոխզիջումներ գտնել՝ նշելով, որ ընդհանուր առմամբ երկրները գործում են որպես միասնական կազմակերպություն։ «Կարծում եմ, որ մենք պետք է անցնենք այս դժվարին շրջանը, և դա էլ ավելի կմիավորի մեր կազմակերպությունը այն սկզբունքների վրա, որոնք անհրաժեշտ և հնարավոր են յուրաքանչյուր պետության համար»,- ասել է նա։

Լուկաշենկոյի խոսքով՝ այսօր բավականաչափ մարտահրավերներ կան. «Մենք մեր նախագահության ժամանակ ռիսկի ենք դիմել և ծրագրում ներառել ենք ու փորձելու ենք լուծել մեզ մոտ առկա խնդիրները, հատկապես՝ ՀԱՊԿ անդամ երկրների սահմաններում: Ես իզուր չեմ խոսում Ձեր փորձի մասին։ Դուք հիանալի հիշողություն ունեք: Դուք լավ գիտեք Կովկասը և Կենտրոնական Ասիան: Մենք այնտեղ խնդիրներ ունենք: Եկեք փորձենք լուծել դրանք և, որքան հնարավոր է, միավորենք Հավաքական անվտանգության պայմանագրի կազմակերպությունն այս դժվարին ժամանակներում: Դուք տեսնում եք, թե ինչ է կատարվում շրջակայքում»,- ասել է նա։