Նիկոլ Փաշինյանի իշխանությունը բուռն տեմպերով գնում է դեպի բռնապետություն
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանի իշխանությունը բուռն տեմպերով գնում է դեպի բռնապետություն։ Երեկ Ոստիկանության Էրեբունու բաժնում տեղի ունեցած իրադարձությունը աննախադեպ և չլսված էր։ Ոստիկանության մի խումբ ծառայողներ բռնություններ են գործադրել, իրենց մասնագիտական գործունեությունն իրականացնող փաստաբաններ Մարզպետունի Ավագյանի և Էմանուել Անանյանի նկատմամբ, տևական ժամանակ ոտքերով և ձեռքերով հարվածել են փաստաբաններին՝ հայհոյանքներ հնչեցնելով նրանց հասցեին։ Փաստաբաններից մեկին ոստիկանության ծառայողները բռնությամբ դուրս են բերել Ոստիկանության բաժնից։
Հայաստանում անկախության 32 տարիների ընթացքում բռնություններ բազմաթիվ անգամներ են եղել, սակայն նույնիսկ նախկին իշխանությունների օրոք, որ փաշինյանական վարչախմբի ներկայացուցիչներն ու քարոզիչները սիրում են ներկայացնել, երբևէ չի եղել նման դեպք, որ փաստաբանի նկատմամբ բռնություն գործադրվի, այն էլ ոստիկանության բաժնում՝ իր մասնագիտական պարտականությունները կատարելու համար։
Տարբեր վարկանիշներում անկում գրանցող փաշինյանական վարչախումբը ժողովրդավարության և օրենքի գերակայության մասին ճամարտակելուց առաջ, շատ ավելի լավ կլինի, որպեսզի մտածի, թե ինչ ուղով են տանում հանրապետությունը։ Թերևս, սակայն, որևէ կերպ զարմանալ չարժի Հայաստանը ոստիկանապետության վերածելու Փաշինյանի քայլերից, ընդհակառակը, 44-օրյա պատերազմից հետո Նիկոլ Փաշինյանն ամեն ինչ անում է զուտ իր իշխանությունը ամրապնդելու և հանրությունից իրեն մահակներով ու ոստիկանական արգելապատնեշներով տարանջատելու ուղղությամբ։
Այս համատեքստում բնավ էլ զարմանալի չեն տարածվող տեղեկությունները, որ Փաշինյանը բռնապետական հակումներ է դրսևորում նույնիսկ սեփական թիմի կազմում։ «Քաղաքացիական պայմանագիր» կուսակցության ներկայացուցիչները, որոնք սիրում են գլուխ գովել, թե իբր իրենց խմբակցությունում և կուսակցական մարմիններում բավականին բուռն քննարկումներ են լինում տարբեր հարցերում, պարզապես վերածվել են Նիկոլ Փաշինյանի համար կոճակ սեղմողների և առանց աչք թարթելու դակում են «գերագույն» առաջնորդի բոլոր ցանկությունները։ Փաշինյանն էլ օգտվելով այդ հանգամանքից ավելի ու ավելի է ձգում սեփական կուսակիցների, ոստիկանների և պետական մարմինների սանձերը՝ լիակատար վերահսկողություն սահմանելով։
Արթուր Մինասյան
