Ադրբեջանի իշխանությունը նոր սադրանքներ է փորձում իրականացնել Հայաստանի դեմ
ՎԵՐԼՈՒԾՈՒԹՅՈՒՆՆԵՐ
Ադրբեջանի իշխանությունը նոր սադրանքներ է փորձում իրականացնել Հայաստանի դեմ։
Ալիևյան վարչախմբի կողմից վերահսկվող «Haqqin.az» պարբերականը հրապարակել է՝ «Հայաստանն ու Իրանը հարձակում են նախապատրաստում Լաչինի և Կուբաթլուի վրա» հոդվածը՝ վկայակոչելով, իբր սպասվող ագրեսիայի մասին օպերատիվ տեղեկատվությանը։
Նշում է, թե Հայաստանի և իսլամական հեղափոխության պահապանների կորպուսի 30 զինծառայողներից բաղկացած դիվերսիոն խմբի մասնակցությամբ ինչ-որ սադրանք են նախապատրաստում։
Ըստ ադրբեջանցիների՝ խմբի ղեկավարը ԻՀՊԿ գեներալ է, ում անունը հայտնի է Ադրբեջանի կառավարությանը, և այդ դիվերսիոն խումբը նախպատեսում է երկու հարձակումներ իրականացնել Լաչինի և Կուբաթլուի շրջանների ուղղությամբ։ Թե՛ Հայաստանի պաշտպանության նախարարության մամուլի քարտուղարը, և թե՛ ԱԱԾ տնօրենի խորհրդականը ադրբեջանական լրատվամիջոցների տեղեկությունները բացարձակ սուտ և իրականությանը չհամապատասխանող են որակել։
Խնդիրն իրականում այն է, որ Հայաստանին և Իրանին փորձելով ներքաշել նման կեղտոտ խաղի մեջ՝ Ադրբեջանն ինքն է սադրանք նախապատրաստում և միջազգային հանրության և Արևմուտքի հետ խնդիրներ ունեցող Իրանին ներքաշելով նման սադրանքի մեջ՝ փորձում է միջազգային ասպարեզում ապահովագրել իրեն՝ սեփական սադրանքների համար ողջ մեղքը բարդելով Հայաստանի և Իրանի վրա։
Հատկապես այս պայմաններում, երբ Թուրքիայում երկրաշարժ է և օբյեկտիվորեն թուրքական կողմը գտնվում է աշխարհի «կարեկցանքի» տակ, Ադրբեջանն այսպիսի սադրանքներով , կամ սադրանքների նախապատրաստումներով փորձում է լուծել իր համար կարևորագույն խնդիրներից մեկը՝ հատկապես շեշտելով Լաչինի միջանցքի մասին, որն արդեն երկու ամսից ավելի շրջափակված է նույն ադրբեջանցիների կողմից։
Հայաստանի իշխանությունները հերքումներից բացի պարտավոր են նաև զգալի սպառազինություն և մարտական ուժ կենտրոնացնել տվյալ՝ Ադրբեջանի հետ սահմանային հատվածներում, հնարավոր սադրանքները կանխելու, նոր տարածքային կորուստներից խուսափելու համար։
Մերի Խաչատրյան
