Ընդդիմախոսների հետապնդումները՝ ցածրորակ թատրոնի ելևէջներով

«Ընդդիմադիր Հայաստան» խմբակցության ղեկավար Սեյրան Օհանյանը զրկվել է պատգամավորական անձեռնմխելիությունից։

«Հայաստան» և «Պատիվ ունեմ» խմբակցությունները չեն մասնակցել քվեարկությանը, իսկ «Քաղաքացիական պայմանագրից» մասնակցած բոլոր 68 պատգամավորները կողմ են քվեարկել Սեյրան Օհանյանին անձեռնմխելիությունից զրկելուն։

Այսօր, գրեթե նույն կազմով, ՔՊ պատգամավորները մասնակցել են մեկ այլ պատգամավորի՝ Արմեն Չարչյանին անձեռնմխելիությունից զրկելու քվեարկությանը և նրան ևս զրկել անձեռնմխելիությունից։

Ընդդիմադիր խմբակցությունները ընդհանրապես հրաժարվել են մասնակցել այդ թատրոնին և փաշինյանականներին թողել էին իրենց «հպարտ» մենության մեջ, ուստի և հանրության ծաղրուծանակին չարժանանալու համար իշխանությունը ստիպված եղավ քննարկումների զգալի մասը փակ անցկացնել՝ վկայաբերելով, իբր պետական գաղտնիքի հանգամանքը։

Ըստ էության, ակնհայտ էր, որ գործող իշխանություններն ամեն ինչ անում են իրենց ընդդիմախոսներին բռնաճնշելու, նրանց դեմ քրեական գործեր կարելու համար։

Ամենևին չցանկանալով հերքել, որ ո՛չ Սեյրան Օհանյանի և ո՛չ էլ Արմեն Չարչյանի մեղավորությունը, կամ էլ հաստատել նրանց անմեղությունը, փաստենք, որ իրականում ընդդիմադիր պատգամավորների դեմ քրեական գործեր են հարուցվում և նրանց հետապնդումների են ենթարկում բացառապես մեկ պատճառով, որ նրանք ընդդիմադիր են, այլապես գործող իշխանությունները 2018 թվականի «հեղափոխությունից» հետո 5 տարի ժամանակ ունեին բոլոր նախկիններին պատժելու իրենց արած հանցագործությունների համար։

Մինչ օրս որևէ այսպես «նախկին», որևէ հանցագործության համար չի պատժվել, ինչը վկայում է, որ կա՛մ փաշինյանական իշխանությունը չունի համապատասխան հմտություններ, կամք և նորմալ մասնագետներ, իրական քրեական գործեր բացահայտելու, կատարված ապօրինությունները վեր հանելու և հանրությանը ներկայացնելու համար, կամ էլ շատ դեպքերում գործարքի են գնացել նույն նախկինների հետ, իսկ քրեական գործերը հարուցվում են ըստ նպատակահարմարության, տվյալ պահի թելադրանքով։

Ամեն դեպքում, փաստն այն է, որ նույնիսկ այս՝ Սեյրան Օհանյանի և Չարչյանի դեմ հարուցված քրեական գործերում փաշինյանական վարչախումբը ձախողվելու է։

Սարգիս Անտոնյան