Ռուբեն Վարդանյանը բարձր վարկանիշ ունի Հայաստանում և Արցախում

«Ֆոկուս» եվրասիական սոցիոլոգների ազատ դաշինքը հրապարակել է սոցիոլոգիական հարցման արդյունքները, որոնք իրականացվել են Հայաստանում և բավական ուշագրավ արդյունքներ ցույց տվել։

Ըստ այդ հարցումների՝ գործող վարչապետ Նիկոլ Փաշինյանի ընտրական վարկանիշը Հայաստանում կազմում է 21,67 %, երկրորդ տեղը  զբաղեցնում է Արցախի պետնախարար Ռուբեն Վարդանյանը։

Ըստ հարցվածների՝ եթե Ազգային ժողովի ընտրությունները տեղի ունենային հենց այսօր, ապա Ռուբեն Վարդանյանի գլխավորած քաղաքական ուժը կստանար 20,36 %։ Խորհրդարանական ընդդիմության առաջնորդ Ռոբերտ Քոչարյանը չափազանց ցածր ցուցանիշ է ցույց տվել՝ 7,74 % զբաղեցնելով ընդամենը 4-րդ տեղը, իսկ նրանից առաջ էլ նախկին օմբուդսմեն Արման Թաթոյանն է՝ 9,17%։

«Ֆոկուս»-ի հարցումների մեջ ամենաուշագրավը հակավարկանիշների ցուցադրումն է։ Եթե Ռոբերտ Քոչարյանը 67,62 % հակավարկանիշ ունի, իսկ Նիկոլ Փաշինյանը միանգամից 58,10 %, ապա Ռուբեն Վարդանյանի հակավարկանիշը չափազանց ցածր է՝ ընդամենը 8,21 %։

Հարցվածների միայն այդքան մասն է հայտնել, թե որևէ պարագայում իր քվեն չէր տա Արցախի պետնախարարի օգտին։

Ի դեպ, բավականին բարձր ցուցանիշ է նաև ցույց տվել Ռուբեն Վարդանյանի գլխավորած «Ապրելու երկիր» կուսակցության համանախագահ Մանե Թանդիլյանը։ Նա ստացել է 5,34 % քվե, ընդ որում ևս բավական ցածր հակավարկանիշ ունի՝ 7,38%։

Եվրասիական սոցիոլոգների այս հարցումները վկայում են, որ Արցախում Ռուբեն Վարդանյանի գործունեությունը չափազանց դրական է գնահատվում ոչ միայն Արցախի բնակչության, այլ նաև Հայաստանի բնակչության կողմից, ուստի և բավական շոշափելի և ակնառու են նրա վարկանիշի զգալի աճը։

Այս հարցումը նաև վկայում է, որ Հայաստանի քաղաքացիները գնահատում են ռեալ արված աշխատանքը։ Եթե Նիկոլ Փաշինյանի դեպքում հասկանալի է նրա «զոմբիների» ինչպես նաև պետական ապարատի ու վարչական ռեսուրսի կիրառման փաստը, ապա Ռուբեն Վարդանյանի դեպքում նրա թե՛ բարձր վարկանիշը և թե՛ ցածր հակավարկանիշը վկայում են, որ Հայաստանի քաղաքացիները լրջորեն դիտարկում են Ռուբեն Վարդանյանին և նրա գլխավորած քաղաքական ուժին քվե տալու հնարավորությունը։

Թերևս այս հանգամանքը կարող է լրջորեն մտահոգել Նիկոլ Փաշինյանին և նրա սպասարկուներին, որոնք առաջիկայում իսկական հարձակում կսկսեն Ռուբեն Վարդանյանի դեմ։

Մերի Խաչատրյան