«Ժողովրդավարության բաստիոնի» հիբրիդը. Եվրոպացիները քաշում են Փաշինյանին

Ժողովրդավարությունը որպես բրենդ, Հայաստանն էլ «ժողովրդավարության բաստիոն» հռչակած փաշինյանական վարչախումբը հերթական լայն ապտակն է ստացել միջազգային կառույցներից։

Economist Intelligence Unit-ի կողմից հրապարակված Ժողովրդավարության 2022 թ.-ի ինդեքսում Հայաստանը բարելավել է դիրքը յոթ հորիզոնականով՝ զբաղեցնելով 82-րդ տեղը։

Հայաստանը դեռ դասակարգվում է որպես «հիբրիդային ռեժիմ»: Հայաստանի հարևաններ Վրաստանն ու Ադրբեջանը զբաղեցնում են համապատասխանաբար 90-րդ և 134-րդ հորիզոնականները, Թուրքիան՝ 103-րդ, Իրանը՝ 154-րդ։

Հայաստանը որպես «հիբրիդային ռեժիմ» է դասակարգվել Բոսնիա և Հերցեգովինայի, Վրաստանի և Ուկրաինայի հետ միասին: Իսկ «ավտորիտար ռեժիմների» շարքում, ի թիվս այլ երկրների, հայտնվել են Ադրբեջանը, Բելառուսը, Ռուսաստանը:2006 թ.-ից հրապարակվող Ժողովրդավարության ինդեքսն ուսումնասիրում է ժողովրդավարության վիճակը 165 պետություններում և 2 տարածքներում:

Փաշինյանական վարչախումբը, ըստ ամենայնի, նոր զեկույցը կփորձի ներկայացնել որպես իրենց ջանքերի գնահատում և դրական զարգացում, սակայն փաստն այն է, որ Հայաստանը նույնիսկ Արևմուտքում չի ընկալվում որպես ժողովրդավարական երկիր։

ՀՀԿ փոխնախագահ Արմեն Աշոտյանի գնահատմամբ,Հայաստանի իշխանություններին նույնիսկ իրենց գեոպոլիտիկ հովանավորները չեն կարողանում բնութագրել ավելին՝ քան «հիբրիդային ռեժիմ»-ն է։

Վարչախմբին որակելով որպես մուտանտների «հիբրիդային բաստիոն»՝ Աշոտյանը մեկնաբանել է, թե ինչ է իրենից ներկայացնում «հիբրիդային ռեժիմը», երբ ընտրություններն ունեն էական խախտումներ, որոնք հաճախ խանգարում են նրանց լինել և՛ ազատ, և՛ արդար:

Ընդդիմադիր կուսակցությունների և թեկնածուների վրա իշխանության ճնշումը կարող է սովորական լինել: Կոռուպցիան հակված է համատարած լինելու, իսկ օրենքի գերակայությունը թույլ է: Թույլ է նաև քաղաքացիական հասարակությունը թույլ է, որպես կանոն, տեղի են ունենում ճնշումներ և ճնշումներ լրագրողների նկատմամբ, իսկ դատական համակարգը անկախ չէ:

Իհարկե, արևմտյան ցանկացած նման վարկանիշ նաև քաղաքական բաղադրիչ ունի և լիովին վստահելի համարվել չի կարող, սակայն փաստն այն է, որ անգամ եվրոպացիները չեն հավատում Նիկոլ Փաշինյանի սրտաճմլիկ «փաստարկներին»։ 

Աննա Նադոյան