Հարցում շրջափակման ֆոնին. Լաչինի միջանցքը Հայաստանին օտարել է Ռուսաստանից
ՎԵՐԼՈՒԾՈՒԹՅՈՒՆՆԵՐ
Trmzk.ru–ն գրում է, որ Gallup հետազոտական ընկերության հայաստանյան ներկայացուցչությունը ներկայացրել է սոցիոլոգիական մեծ հարցման արդյունքները։ Հունվարի 17-ից 24-ը հանրապետությունում անցկացված հասարակական կարծիքի հեռախոսային հետազոտությանը մասնակցել է 1100 հարցվող։
Հարցման մասնակիցների 42,5%-ը Ադրբեջանի իշխանություններին է մեղադրել Լաչինի միջանցքը փակելու և Լեռնային Ղարաբաղի շրջափակման մեջ։ Հարցվածների 30,2%-ը դա համարել է «ռուսական հետք»։ 29%-ը կատարվածի համար մեղադրել է Հայաստանի իշխանություններին, իսկ 17,2%-ը՝ Թուրքիային։ Այս բոլորին «մեղավոր» է համարել հարցվածների 9,8%-ը։
Հարցվածների 41,6%-ը դրական է գնահատել Ֆրանսիայի արձագանքը Լեռնային Ղարաբաղի շրջափակմանը, բացասական՝ 13,3%-ը։ Իրանի պարագայում կարծիքները բաժանվել են հետևյալ կերպ՝ 25,4 տոկոսը դրական, 18,7 տոկոսը՝ բացասական։ Ինչ վերաբերում է Ռուսաստանին, ապա Լաչինի միջանցքի փակմանը Ռուսաստանի արձագանքի վերաբերյալ հայ հասարակության ընկալումը,ըստ Gallup-ի տվյալներով, խիստ ցայտուն է. հարցվածների միայն 8,5%-ն է այն գնահատել դրական, իսկ 51,2%-ը՝ բացասական։ Միաժամանակ, հարցվածների կարծիքով, առաջին հերթին Ռուսաստանն է պարտավոր ապաշրջափակել Լեռնային Ղարաբաղը։ Այդպես է կարծում հարցվածների 49,4%-ը։
Ինչպես ցույց են տալիս ուսումնասիրության արդյունքները հայ հասարակության վերաբերմունքը Լեռնային Ղարաբաղում ռուս խաղաղապահների նկատմամբ սասանվել է։ Հարցվածների 50,4%-ը դրական է գնահատել տարածաշրջանում ռուս խաղաղապահների տեղակայումը (Ղարաբաղում 44-օրյա պատերազմի ավարտից անմիջապես հետո 2020 թվականի նոյեմբերին անցկացված հարցման ժամանակ եղել է 81,5%-ը)։ 47,9%-ը բացասական է գնահատել ռուս խաղաղապահների տեղակայումը (10,4%-ը՝ 2020 թվականի նոյեմբերին)։
Ներկայիս ծանր իրավիճակում, որում հայտնվել է Հայաստանը, Իրանից ռազմաքաղաքական աջակցություն է ակնկալում 40,1%-ը, Ֆրանսիայից՝ 34,2%-ը, Ռուսաստանից՝ 30%-ը, ԱՄՆ-ից՝ 27,8%-ը, Հնդկաստանից՝ 25,6%-ը։ Դրան հաջորդում են Չինաստանը (5,1%), Գերմանիան (3,2%), ՆԱՏՕ-ն (2,4%), ՄԱԿ-ի Անվտանգության խորհուրդը (1,4%) և ՀԱՊԿ-ը (0,3%)։
Մինչդեռ հարցվածների մեծամասնությունը դրական է արձագանքել Հայաստանի տարածքում ռուսական ռազմակայանի առկայությանը։ «Ինչպե՞ս եք վերաբերվում Հայաստանի տարածքում 102-րդ ռուսական ռազմակայանի առկայությանը» հարցին դրական է պատասխանել 53,4%-ը, բացասական՝ 37,4%-ը, 9,2%-ը դժվարացել է պատասխանել։
Հարցման մասնակիցների մեծամասնությունը կողմ է եղել Հայաստանի իշխանությունների իրենց տարածքում ՀԱՊԿ զորավարժությունների անցկացումը մերժելու վերջին որոշմանը` 50,7%: Զորավարժությունների դադարեցմանը բացասաբար է արձագանքել 39,5%-ը։
Հիշեցնենք, որ Լաչինի միջանցքը՝ Լեռնային Ղարաբաղի միակ տրանսպորտային կապն արտաքին աշխարհի հետ, դեկտեմբերի 12-ից արգելափակված է ադրբեջանցի ակտիվիստների կողմից, ովքեր շաբաթներ շարունակ բողոքի ակցիա են անցկացնում բնապահպանական կարգախոսների ներքո պահանջելով դադարեցնել Ղարաբաղի տարածաշրջանի բնական պաշարների «ապօրինի շահագործումը»։ 2020 թվականի նոյեմբերի 9-ի եռակողմ հայտարարության համաձայն 5 կմ լայնությամբ միջանցքը պետք է գտնվի ռուս խաղաղապահների հսկողության տակ։
Նյութը հրապարակման պատրաստեց Կամո Խաչիկյանը
