Պաշտպանության նախարարը բուռն գործունեության իմիտացիա է անում

Գեղարքունիքում տեղի ունեցած ողբերգությունից հետո Պաշտպանության նախարարությունը քարոզչության և ցուցադրական իմիտացիոն գործունեության նոր առիթ է ստացել։

Պաշտպանության նախարար Սուրեն Պապիկյանը երեկ անակնկալ այցելություն է արել զորամասերից մեկում, տեղում ծանոթացել ծառայության կազմակերպման ընթացքին։

Մի կողմ թողնենք, որ դատելով տարածված լուսանկարներից, այցելությունը ամենևին էլ պատահական ու անակնկալ չէր։ Հայկական բանակում ձևավորված ավանդույթի համաձայն նման անակնկալ այցելություններից օրեր, նույնիսկ շաբաթներ առաջ զորամասերում տեղյակ են լինում և մանրամասն պատրաստվում են նախարարների այցին։

Մեր աղբյուրների փոխանցմամբ՝ այս անգամ ևս ավանդույթը չի խախտվել։ Պապիկյանը զրուցել է սպայական կազմի հետ, ինչպես նաև սերժանտների, ներկայացրել իր մոտեցումները, լսել նրանց, հանձնարարություններ տվել։ Պաշտպանության նախարարության մամուլի քարտուղարն էլ հայտարարել է, թե Հայաստանից զինված ուժերում մեկնարկած բարեփոխումների շրջանակներում նախատեսվում է փոփոխել անձնակազմի հանդերձանքը, այդ թվում՝ դաշտային, ամենօրյա, գրասենյակային, կուրսանտական և համազգեստի այլ տեսակներ։

Փաստն ինքնին վկայում է, որ փաշինյանական վարչախումբը հերթական անգամ չպատկերացնելով հայկական բանակում եղած խնդիրներն ու պրոբլեմները փորձում է ամեն ինչ անել տեսանելի մակարդակում իբր հանրության աչքերին թոզ փչելու համար։ Այդպես եղավ 2018 թվականից հետո, երբ հիմնական խնդիրները լուծելու, բանակում կարգապահությունը լուրջ մակարդակի վրա դնելու, նորմալ սպառազինություն գնելու, անորակ զենքերից հրաժարվելու և զինվորներին լուրջ պատրաստության ենթարկելու փոխարեն՝ Փաշինյանը սկսեց խոսել «կլուբնիկի» ու «տրուսիկ-մայկայի» մասին, տեսանելի միակ փոփոխությունը տեղի ունեցավ միայն ճաշարաններում։

Այս դեպքում էլ գործ ունենք հերթական նման իմիտացիայի հետ, երբ փոխելով զինվորների համազգեստը, փորձելու են համոզել, թե իբր բանակում լուրջ փոփոխություն են իրականացնում։ Հայաստանի բանակի մասին նույնիսկ մակերեսային տեղեկություն ունեցող ցանկացած ոք կարող է փաստել, որ այս հայտարարությունները բացարձակ օդ են։

Աննա Նադոյան