Նիկոլ Փաշինյանը թքած ունի սեփական իրավապաշտպանների վրա
ՎԵՐԼՈՒԾՈՒԹՅՈՒՆՆԵՐ
Նախօրեին մի խումբ իրավապաշտպաններ բաց նամակով դիմել են Հայաստանի իշխանություններին՝ կոչ անելով տխրահռչակ դատավոր Մնացական Մարտիրոսյանին չնշանակել Երևան քաղաքի առաջին ատյանի ընդհանուր իրավասության քրեական դատարանի նախագահ։
Բոլոր այդ կազմակերպությունները, որոնք 2018 թվականի «հեղափոխության» մասնակիցներ են և տևական ժամանակ աչքի են ընկնում Փաշինյանի նկատմամբ իրենց լոյալությամբ, ի վերջո զարթնել են և հիշել, որ Մնացական Մարտիրոսյանի քաղաքական հնչեղ գործերի ներգրավվածությունը, երբ նրա դատավճիռներով դատապարտվել են քաղաքական բանտարկյալներ, ինչպես նաև մարդու իրավունքների եվրոպական դատարանի մի շարք վճիռներով հաստատվել են հիմնարար իրավունքների խախտումներ և քաղաքական հետապնդման փաստեր, որպես հետևանք ֆինանսական մեծ բեռ է դրվել պետության վրա, չի կարող դառնալ նման դատարանի նախագահ։
Փաստելով, որ Հայաստանի սահմանադրությամբ արդարադատությունը իրականացնելիս դատավորն անկախ է, անաչառ և գործում է միայն սահմանադրությանը և օրենքներին համապատասխան, հայտարարության հեղինակները նշել են, թե ակնհայտ է, որ Մնացական Մարտիրոսյանի բացասական մասնագիտական հետագիծն ու բացասական բարեվարքությունը կասկած է առաջացնում հանրության մոտ, որ նա կարող է համապատասխանել դատավորին առաջադրված բարձր չափանիշներին։
«Մարտիրոսյանը շարունակում է մնալ ոչ բարեկարգ դատավոր, որի առնչությամբ ցանկացած մասնագիտական առաջխաղացում էլ ավելի է մեծացնում դատական համակարգի և բարձրագույն դատական խորհրդի նկատմամբ հանրային անվստահությունը»,- նշել են իրավապաշտպանները։
Թերևս հանրային բացասական կարծիքի պայմաններում հնարավոր եղավ Մնացական Մարտիրոսյանին պարտադրել հրաժարվել հակակոռուպցիոն դատարանի դատավորի, ապա և նախագահի պաշտոններից, սակայն Փաշինյանն ամեն ինչ արեց, որպեսզի ժամանակին իրեն տևական ազատազրկման դատապարտած, սակայն հետագայում նրա սրտի դատավոր դարձած Մնացական Մարտիրոսյանը մի յուղոտ պաշտոն ստանա։
Բարձրագույն դատական խորհրդի առաջարկով՝ նախագահ Վահագն Խաչատուրյանը Մնացական Մարտիրոսյանին նշանակել է Երևան քաղաքի առաջին ատյանի ընդհանուր իրավասության քրեական դատարանի նախագահ։
Տխրահռչակ դատավորը, որի բացասական հետագիծն արձանագրում են անխտիր բոլորը, այդ թվում նաև գործող իշխանությունների տարատեսակ ներկայացուցիչներ, բացարձակապես չի կոմպլեքսավորվում այդ փաստից և շարունակում է մարդ դատապարտել հանուն Նիկոլ Փաշինյանի, իսկ վերջինս էլ չափազանց շռայլ է իր մանկլավիկների ու խամաճիկների նկատմամբ և հաշվի չի առնում, որ ժամանակին նրանց թրի տակով անցել է նաև ինքը, ուստի և «իրավապաշտպանների» գրած՝ թերևս եզակի արդարացի բողոքն այդպես էլ կմնա թղթի վրա, իսկ մի քանի իրավապաշտպաններ խոհանոցներում, պատերի տակ, կամ ԶԼՄ-ներով կբողոքեն, ապա և կանցնեն իրենց սովորական աշխատանքին, իսկ Հայաստանում քաղբանտարկյալների թիվը կշարունակի աճել, քանի որ նրանց դատում են տխրահռչակ Մացոները։
Աննա Նադոյան
