Փաշինյանական վարչախմբի թիրախում նաև սփյուռքի ազդեցիկ դեմքերն են

Հայաստանի իշխանությունների թիրախում են ոչ միայն տեղական ընդդիմախոսները, այլ նաև՝ Սփյուռքի և Արցախի։

Նախօրեին գործող վարչախումբը առանց որևէ պատճառաբանության Հայաստանի համար անցանկալի անձ է համարել Ֆրանսիայի ՀՅԴ Նոր սերունդ երիտասարդական միության կենտրոնական վարչության ատենապետ Նժդեհ Գարագավորյանին։

Վերջինս պետք է ժամաներ Հայաստան փետրվարի 6-ից 10–ը Սյունիքում տեղի ունենալիք ՀՅԴ երիտասարդական համաշխարհային համագումարին մասնակցելու, սակայն նրան հայտնել են, որ չի կարող ժամանել Հայաստան, քանի որ իրեն պարզապես թույլ չեն տա։

Մեր տեղեկություններով՝ այդ միջոցառմանը մասնակիցների մի զգալի մասին գործող իշխանությունները մտադիր են ընդհանրապես թույլ չտալ Հայաստան ժամանել։

Ըստ էության, նախկինում էլ եղել են դեպքեր, երբ Նիդեռլանդների ՀՅԴ որոշ ներկայացուցիչների Հայաստանի գործող իշխանությունները պարզապես արգելել են ժամանել։ Փաստացի այս ամենը վկայում է, որ հայաստանյան իշխանությունները Թուրքիայի և Ադրբեջանի հետ ձեռք ձեռքի տված պայքարում են, ոչ միայն տեղական ընդդիմախոսների, այլ նաև Սփյուռքի ընդդիմադիրների հետ։

Հատկապես թիրախում ՀՅԴ-ն է, որն ի տարբերություն այլ քաղաքական միավորների ավելի կազմակերպված է, ավելի լուրջ ռեսուրսների է տիրապետում և ավելի մեծ կապեր ունի, ուստի և չափազանց վտանգավոր է դառնում ոչ միայն Փաշինյանի համար սեփական օրակարգը այդ երկրներում առաջ տանելու, այլ նաև ցեղասպանության և, Արցախի հարցում նրանց ունեցած անզիջում դիրքորոշման պատճառով, վտանգավոր են նաև Թուրքիայի և Ադրբեջանի համար։

Ուստի, բնավ զարմանալի չէ, որ առաջին հերթին թիրախի տակ են Սփյուռքի դաշնակցականները։ Թերևս ցանկացած մեկը ով դեմ է Նիկոլ Փաշինյանի իշխանությանը առաջիկայում հայտնվելու է նման իրավիճակում։

ՔՊ մեր աղբյուրների փոխանցմամբ՝ վերջերս քննարկել են Սփյուռքի կազմակերպությունների հետ հարաբերվելու հնարավորությունները և հստակ ակնարկել, որ ՀՅԴ–ի հետ համագործակցությունը որևէ մակարդակում բացառվում է, քանի որ Դաշն-կցությունը բավականին անզիջում դիրքորոշում ունի փաշինյանական իշխանության նկատմամբ, ուստի և հանձնարարվել է հնարավորինս ավելի շատ տեղեկություններ հավաքել արտերկրի դաշնակցականների և Սփյուռքի այլ ազդեցիկ ներկայացուցիչների մասին, իսկ խնդիրներ նկատելու դեպքում՝ անմիջապես փոխանցել Ազգային անվտանգության ծառայություն, այդ անձանց մուտքը Հայաստան արգելելու նպատակով։

Մինաս Ավագյան