Ռուսաստանը կոշտ է արձագանքում ՀԱՊԿ-ի հասցեին քննադատություններին
ՎԵՐԼՈՒԾՈՒԹՅՈՒՆՆԵՐ
Հավաքական անվտանգության պայմանագրի կազմակերպության վերաբերյալ Հայաստանի իշխանությունների քննադատական հայտարարությունները հարուցել են ռուսական իշխանության բուռն և կոշտ հակազդեցությունը։
Ըստ էության, ՌԴ ԱԳՆ կոշտ պատասխանը Հայաստանին տրամաբանական էր։ ՀԱՊԿ-ն ինքն իրենով բացարձակապես ոչինչ չի ներկայացնում, ավելին այդ կառույցի շատ անդամներ ավելի լավ հարաբերություններ ունեն Ադրբեջանի, քան Հայաստանի հետ, բայց միաժամանակ Հայաստանի իշխանությունները պետք է հաշվի առնեն այն հանգամանքը, որ ՀԱՊԿ-ին քննադատելով քննադատում են առաջին հերթին ՀԱՊԿ-ի թիվ մեկ ջութակին՝ Ռուսաստանին, ուստի և ՀԱՊԿ-ի հասցեին ցանկացած արտահայտություն արժանանալու է Ռուսաստանի կոշտ գնահատականներին։
Նախորդ օրվա ասուլիսում ՀԱՊԿ-ի վերաբերյալ հայտարարություններից հետո, Մարիա Զախարովան երեկ մի ամբողջ շարք կոշտ հայտարարություններ է արել Հայաստանի և Նիկոլ Փաշինյանի հասցեին, ընդցմին՝ անգամ մեղադրելով բանավոր պայմանավորվածությունները չկատարելու, սեփական ժողովրդի հետ անկեղծ չլինելու մեջ։ Թվում էր, թե Հայաստանի իշխանությունները հաշվի կառնեն այս «դեղին քարտը», սակայն Հայաստանի ԱԳն-ն շատ ավելի հեռուն է գնացել։
ՀԱՊԿ-ից հայտնել էին, թե ըմբռնումով են մոտենում Հայաստանում ստեղծված իրավիճակին, Հայաստանի ԱԳՆ խոսնակ Վահան Հունանյանն էլ հայտարարություն է տարածել՝ նշելով, թե ՀԱՊԿ երկրները ՀԱՊԿ քարտուղարությունից չեն ակնկալում իրենց գործողություննեերի և որոշումների որևէ ըմբռնում։
Ավելին, քարտուղարության իրավասությունների շրջանակը չի ներառում ՀԱՊԿ հավաքական անվտանգության խորհրդի անդամների հայտարարությունների մեկնաբանումը։ Հայաստանի ԱԳՆ-ն ՀԱՊԿ-ին պարզ և հստակ ասում է, որ այդ կառույցը վերազանցել է իր լիազորությունները և այլ մեկնաբանություններ, որոնց իրավունքը չուներ։
Ազգային Ժողովի նախագահն էլ լրագրողների հետ ճեպազրույցում նշել է, թե ՀԱՊԿ-ն կամ պետք է գործի, կամ հայտարարի, որ գոյություն չունի։ Վստահաբար կարելի է նշել, որ այսօր կամ վաղը Ռուսաստանից կոշտ արձագանքների հերթական խմբաքանակը կստացվի։ Մինչդեռ Հայաստանի իշխանությունները իրենք էլ են ձգտում ավելի շատ սրել իրադրությունը՝ ՀԱՊԿ-ին անկյուն մղելով։ Թե ինչ հետևանքներ դա կարող է ունենալ Հայաստանի համար, հստակ չէ։
Մանե Մսրյան
